Ministru Reforma Lejizlativa no Asuntu Parlamentar, Fidelis Manuel Leite Magalhães. Imajen Egas Cristovao

DILI, 05 juñu 2019 (TATOLI) – Governu liuhosi reuniaun Konsellu-Ministru halo análiza ba Deliberasaun Relatóriu Finál husi Revizaun Nasionál Voluntáriu (VNR-sigla inglés) tinan 2019 ba implementasaun Objetivu Dezenvolvimentu Sustentável (ODS), ne’ebé aprezenta husi Ministru Reforma lejislativa no Asuntu Parlamentár, Fidelis Leite Magalhães hamutuk ho sekretariadu.

“Konsellu Ministru rona aprezentasaun husi sekretariadu ba ekipa ne’ebé prepara hela objetivu relatóriu voluntáriu naionál ba objetivu dezenvolvimentu sustentável ne’ebé sei halo aprezentasaun iha Nasaun Unida iha jullu agora,” hateten Ministru Fidelis ba jornalista sira iha Palásiu Governu, kuarta ne’e.

Governante ne’e haktuir, razaun relatóriu ne’e aprezenta ba ezekutivu sira hodi bele fó tempu ba membru governu sira hodi bele fó hanoin ba dokumentu ne’e rasik, nune’e semana oin Konsellu Ministru bele fó apresiasaun no deliberasaun ruma hodi aprova relatóriu ne’e no sei haruka ba Nasoens Unidas iha loron 14 juñu.

Relatóriu ne’e rasik aprezenta progresu kona-ba implementasaun ODS ho indikasaun kona-ba implementasaun ajenda 2030 no sei Timor-Leste sei kontribui  ba Forum Polítiku iha nível aas, ne’ebé sei reuni iha jullu oin mai iha sede Nasaun Unida, Nova Iorke.

Nune’e mós husi relatóriu finál ne’e sei fó koñesimentu kona-ba rezultadu husi prosesu  VNR ne’e rasik.

Alende ne’e, Governu Timor-Leste iha fulan kotuk haruka ona mensajen xafe 11, ne’ebé antes ne’e hetan ona aprovasaun iha Konsellu Ministru.

VNR dezenvolve liuhosi peosesu konsulta ne’ebé mak lidera husi grupu servisu husi ODS ne’ebé formadu husi setór públiku, sosiedade sivól, universidade sira, setór privadu, organizasaun relijioza sira, no Parlamentu Nasionál (PN).

Konselhu Ministru tuir mai sei kontinua análiza ba VNR no halo deliberasaun final ba relatóriu atu haruka ba Nasaun Unida.

Lee mós notísia: http://www.tatoli.tl/2019/05/tl-sei-aprezenta-progresu-dezenvolvimentu-liuhusi-aprezentasaun-ods/

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here