Mesquita An-Nur Dili. Imajen/Google

DILI, 05 juñu 2019 (TATOLI)Loromatan be tara-án iha lalehan nia kakuluk, tuur hakmatek iha lalehan nia sentru. Ha’u sente loromatan hanesan tuur-besik iha ha’u-nia ulun leten. Manas. Ha’u-nia fuuk ne’e belit iha reen-toos. Kosar suli. Anin be huu mós manas. Lalehan no rai, manas hosi rohan ba rohan.

Ha’u hamriik hamahon án iha ai-mahon ida be kuda-harii iha Meskita An’nur nia oin, iha parte  liman-kuana loloos. Ha’u hateke ba Meskita nia oin, sinelus wa’in ho marka no kór oin-oin, hatuur-án tutuir malu iha odamatan nia oin.

Ha’u rona ema wa’in nia lian semo aas, karik sira reza hela Meskita laran. Balun hatais batina-mutin, xapeo metan no mutin doku iha ulun leten, sai hosi Meskita laran. Balun fali, inan-feton lubuk ko’us kosok-oan ho ulun falun-metin ho véo (mutin no metan), la’o tama ba Meskita laran. Ha’u konfuzaun. Matan ne’e hateke tún-sa’e hodi buka-hatene, Prezidente Konsellu Nasionál Izlámiku Timor-Leste (KONISTIL) mak ida ne’ebé no oinsá loos?

Ha’u hanesan ema fuik ne’ebé foin tama iha Meskita An’nur nia área. Ha’u hamriik kahur ho juventude lubun ida. Ha’u halo finji hanesan ha’u mós parte ida hosi sira-nia komunidade. Ha’u rona, joven ida hasee nia maluk joven seluk ho lian ne’ebé familiár iha ha’u tilun. Hanesan lian Makasae maibé rona ba hanesan lian Makalero. Karik sira hosi Lospalos?

Lahatene! Ha’u husu koko ba joven ida bee hamriik besik ha’u. “Karik, belun bele ajuda lori ha’u ba hasoru Prezidente KONISTIL?” Nia hatán, “Karik la mai tanba ohin sei ba silaturahmi ba família sira-nia uma.” “Bele ajuda, ha’u bele hetan Prezidente nia númeru kontatu?” Bele, agora ha’u kontatu para nia bele mai. Maun hein de’it, oras tan Prezidente sei to’o iha iha ne’e. Obrigadu!

Ha’u hein kle’ur be kle’ur! Ha’u hateke ba oin, timoroan ida la’o hakbesik mai ha’u. Mosu iha ha’u-nia laran, karik ida ne’e mak Prezidente ne’ebé ha’u buka no hein? Nia lolo-liman hodi husu: Ita-boot mak hein ha’u? Loos! Ohin ami feriadu, ha’u-nia serbisu-fatin taka. Karik bele, ita na’in rua túr de’it iha Meskita nia tatís ne’e hodi dada-lia.

Governu Timor-Leste estabelese ona loron 6 fulan juñu tinan 2019 nu’udar feriadu nasionál ba selebrasaun Idul Fitri nian, liuhusi despaisu Nú. 2/2019/I/PCM, ne’ebé define feriadu nasionál sira iha data variável nian ba tinan 2019. Komunidade Musulmanu Timor-Leste, durante ne’e iha relasaun di’ak ho Governu Timor-Leste?

“Ha’u haree Relijiaun Musulmanu serbisu hamutuk ho Governu Timor-Leste la’o ho di’ak. Selebrasaun Idul Fitri 1 Syawal 1440 Hijriah tinan 2019, ohin falla uituan tanba desizaun Governu ne’ebé tún, iha 6 juñu mak selebra fila fali loron Idul Fitri. Maibé, loron Idul Fitri loloos mak ohin. Ami triste no laduun simu ida ne’e. Maibé, karik informasaun mak sala ka karik komisaun organizadora hosi ami-nian mak laiha informasaun ba governu. Karik iha miis communication uituan,” dehan Prezidente Konsellu Nasionál Izlámiku Timor-Leste, Pascoal Sidik Lemorai, ba jornalista TATOLI liuhusi entrevista ne’ebé hala’o iha Meskita An’nur, Kampung Alor, Dili, kaurta (5/6/2019).

Maski dada-lia namanas, ema wa’in mai kaer-liman ho ami naba-naban. Sira dehan, mohon maaf lahir dan batin. Ha’u mós lolo-liman kaer-liman ho ema hirak ne’e. Prezidente Sidik Lemorai foti ulun hateten ba ha’u: “Ohin, membru governu la partisipa tanba despaisu foin tún. Maibé, pesoál hosi Partidu Demokrátiku (PD), Mariano Assanami Sabino no reitór hosi universidade balun no jornalista barak mak partisipa,” nia esklarese.

“Ohin, ema dehan silaturahmi. Atividade ohin, ami la’o ba família ka kolega nia uma atu husu deskulpa ba malu. Karik, iha tempu ka durante tinan ida nia-laran, ami halo sala ka iha sala, tempu ona, ami sempre husu perdua ba malu. Tanba, Maromak de’it perdua ita, nusá mak ita lebele perdua ba malu,” nia dehan ho oin-midar.

Nia haloos ninia xapeo mutin be doku iha ulun leten hodi hateten, Idul Fitri signifika katak durante fulan ida nia laran halo jejun, hosi loromatan sa’e ita komesa labele han iha tuku haat madrugada ka jejun. Labele han to’o loron matan tún maizumenus tuku neen ho balun, labele hemu no han. Hosi jejun nia rohan ida ne’e mak temi dehan katak Idul Fitri. Katak, ita hahú fila fali buat foun iha moris foun tanba ida ne’e selebra loron vitória ida-nian.

Nu’udar Prezidente Konsellu Nasionál Izlámiku Timor-Leste, Pascoal Sidik Lemorai apela, “Ha’u-nia mensajen ohin loron, loron boot ba komunidade musulmanu iha Timor-Leste atu nafatin hametin pás no estabilidade iha ita-nia nasaun Timor-Leste. Ha’u husu harohan ba Maromak para ita-nia ukun-na’in sira bele túr hamutuk, bele rezolve problema ki’ik-oan sira ne’ebé iha, para bele lori ita-nia nasaun Timor-Leste ba oin hanesan nasaun selu-seluk.”

Ha’u hateke ba loromatan, loromatan mós fihir ami metin-metin. Rai manas, anin mós manas. Ema sira be sai hosi Meskita nia laran, la’o tuir dalan hamoos sira-nia oin ho liman tanan. Balun hasai xapeo be doku iha sira ulun, nakfilak ba kakehe hodi kehe-án. Manas. Sira la’o hakruuk, ida-ida hakat tuir nia dalan, fila ba sira-nia uman. Ha’u mós husu lisensa, fila fali ba ha’u-nia knuuk. Governu sala? Lae, ne’e miss comunication! Selamat Idul Fitri 1 Syawal 1440 Hijriah. Mohon Maaf Lahir dan Batin.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here