Treinadór prinsipál Aitana FC, Salvador da Silva

DILI, 04 juñu 2019 (TATOLI)—Jogu entre ekipa Aitana FC no Zebra FC  ne’ebé hamahon-án iha Grupu A Segunda Divizaun Liga Futeból Amadora (LFA) sei hala’o iha Kampu Demokrasia,  loraik tuku 16:00 ne’e.

Treinadór prinsipál Aitana FC, Salvador da Silva hateten, jogu ohin loraik hasoru Zebra ne’e jogu importante hodi determina distiñu Aitana hodi promove ba Primeira Divizaun, tanba ne’e, sira sei hatudu jogu ne’ebé di’ak no esforsu tomak nune’e bele manán.

“Jogu aban (ohin) importante loos mai ami. Jogu ne’e mak determina ami hakat ba Primeira Divizaun. Iha jogu rua liu-ba kotuk ami manán ona ne’ebé agora ami iha pontu 6. Sé hasoru Zebra ami manán ne’e di’ak loos ba ami,” tenik Salvador liu hosi konferénsia ba imprensa ne’ebé hala’o iha salaun Xanana Sport Center, Bairru Formosa, Dili, tersa (4/06).

Salvador informa katak kondisaun jogadór Aitana %100 di’ak hotu nune’e treinadór ne’e optimista sira sei gaña duni pontu 3. Entretantu, treinadór Zebra FC la fó komentáriu tanba la partisipa iha konferénsia ba imprensa.

Dadaun ne’e tabela klasifikasaun provizóriu Grup A lidera hosi Kablaki ho pontu 7, Aitana segundu lugár ho pontu 6, FIEL terseiru lugár ho pontu 4,  Cacusan FC kuartu lugár ho pontu 1, Porto Taibessi kintu lugár ho pontu 1 no Zebra FC sestu lugár ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here