Hadau malu bola entre jogadór Aitana FC no Zebra FC. Imajen Mídia LFA

DILI, 05 juñu 2019 (TATOLI)—Kuda Zebra kuandu halai, ema la liu. Maibé, Aitana hurlele kuda Zebra to’o iis halai sala.

Aitana iha Viqueque, Zebra iha Baucau. Iha tempu rezisténsia, Aitana sai fatin reorganizasaun funu to’o manán funu. Iha tempu ukun-án, Aitana reorganiza nia-án liuhusi klube (Aitana FC) no ikus sai vensedór iha kompetisaun.

Zebra, klube ida hosi sidade Ahu-ruin ka sidade Fatuk-Laran (Baucau). Tanba ne’e, Zebra to’os hanesan fatuk. Dudu la ba. Silu la tohar. Maibé, teki-teki, Zebra sai mamar. Halo adversáriu silu ho fásil loos. Aitana silu to’o dalas lima.

La dehan bosok. Ne’e realidade. Liuhusi jogu kontinuasaun Segunda Divizaun Liga Futeból Amadora (LFA) époka 2019 ne’ebé hala’o iha Kampu Demokrasia, Bairru Formosa, Dili, ohin loraik, Aitana FC hikis Zebra FC ho golu 5-0.

Vitória ne’ebé Aitana hetan, izola nafatin armada ‘kulugisa’ túr iha zona dezpromosaun (degradasi-termu Indonézia) ho pontu zero.

Zebra lakon ninia identidade jogu. Lahanesan uluk. Uluk, ekipa forte tebes. Hahú hosi baliza to’o jogadór dudu la ba. Joga ho rápidu no sólidu. Ohin loron, espíritu ida ne’e lakon. Halo Zebra sai mamar. Naran monu iha istória futeból Timor-Leste.

Frakeza ida ne’e, sai oportunidade ba adversáriu. Tanba haree hetan Zebra nia lala’ok jogu, Aitana FC la fó fatin ba Zebra atu livre durante minutu 90.  Aitana hatudu tékniku kontra atake ida mak’as hodi la fó tempu ba defeza no baliza hamriik ho hakmatek.

Tanba ne’e, iha minutu 6, sinál pozitivu monu kedas ba Aitana. Dudu sees defeza Zebra ho neik no sukit bola liu baliza, bola sai golu. Golu marka hosi jogadór Miguel Ximenes (19). Golu ida ne’e, hasa’e Aitana nia pontu (point) sai 1-0.

Golu foin ida, maibé halo jogadór hosi sidade Ahu-ruin la aguenta dadaun. Hahú joga ho burutu. Iha minutu 39, defeza Zebra, Claúdio Correia (2) halo erru hasoru avansadu Aitana, Miguel Ximenes (19) iha grandeia Zebra. Árbitru foti kedan desizaun hodi fó penalidade.  Oportunidade di’ak ba Aitana hodi bele aumenta tan golu ida. Penalidade ezekuta hosi jogadór Nélson Freitas (75) maibé la konsege golu tanba salva hosi guarda rede Zebra, Francisco Boavida (1). Pruit…Pruit…Pruit. Oras mós to’o ona. Jogu primeira parte terminadu.

Duir ba segunda parte, Aitana la mamar. Sira joga ho ofensivu ne’ebé rigór atu hasa’e pontu. Estratéjia ida ne’e fó duni rezultadu kmanek ba sira. Iha minutu 46, Ricardo Mendonça (7), fura rede Zebra liuhusi pasajen bola hosi Nélson Freitas (75). Golu refere kontinua lori Aitana lidera jogu ho rezultadu 2-0.

Zebra mós esforsa-án atu duni tuir golu rua ne’e maibé la hetan oportunidade. Xutu barak mak avansadu Zebra halo maibé xutu hirak ne’e laiha ida mak kona alvu. Aitana kontinua halo kontra atake maka’as liu-tan iha zona Zebra halo Zebra-oan sira hakat sala. La kontrola adversáriu ho di’ak. Tanba ne’e, fó leet ba Aitana atu aproveita. Iha minutu 53, Nélson Freitas konsege sobu defeza Zebra hodi marka golu ba rede Zebra. Rezultadu muda ba 3-0.

Rítmu jogu Aitana sa’e ba beibeik. Provoka jogadór Zebra iha kampu laran sai frustradu. Iha minutu 73, Nélson Freitas (75) hetan tan oportunidade bola pasa kalma hosi médiu Emílio Ribeiro (77) ho naran estimadu ‘Ary’ hodi marka tan golu ida nune’e rezultadu muda ba 4-0.

Zebra namlaek dekor. Laiha ona kbiit atu bele duni tuir golu adversáriu ne’ebé boot ne’e. Aitana hetok tebe-rai. Sira kontinua sobu defeza Zebra. Iha minutu 83, Nélson Freitas (75), halo guarda rede Zebra halai sala. Bainhira halo guarda rede halai sala, nia la marka golu imediata maibé pasa neik ba Miguel Ximenes (19) no Miguel sukit tama ba baliza tuir gostu. Goooolu! Golu muda-án ba 5-0. Rezultadu ida ne’e, lori Aitana FC ba vitória.

Jogu dirije hosi árbitru Nívio Fernandes, juiz liña António Carvalho, Filomeno da Silva no árbitru rezerva mak Elísio Lopes.

Vitória ne’ebé Aitana hetan lori ekipa refere lidera tabela klasifikasaun provizóriu ho pontu 9, segundu lugár Kablaki FC ho pontu 7, terseiru lugár FIEL ho pontu 4, kuartu lugár Cacusan FC ho pontu 1, kintu lugár Porto Taibessi ho pontu 1, sestu lugár Zebra FC ho pontu zero.

Ba jornalista sira, treinadór Aitana FC, Salvador da Silva sente kontente tanba vitória ne’ebé sira hetan lori sira tama ona iha zona seguru.

“Ami kontente loos. Ida ne’e lori ona ami atu sa’e ba Primeira Divizaun. Ami hela jogu rua de’it. Sé ami manán tan ami sa’e ona,” tenik Salvador.

 Iha sorin seluk, treinadór Zebra FC, Rogério Moc, informa katak realidade mak hanesan ne’e tenke simu. “Ida ne’e mak realidade ne’ebé mak ami tenke simu. Kompara ami ho Aitana, sira di’ak liu ami. Ami la’ós lakon iha tékniku maibé tanba problema uitoan iha estrutura mak halo ami sai nune’e,” Rogério konfesa.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here