Sekretáriu Estadu ba Asuntus Kombatentes Libertasaun Nasionál Gil da Costa Monteiro 'Oan Soru'. Imajen António Goncalves.

DILI, 03 maiu 2019 (TATOLI)—Sekretáriu Estadu ba Asuntu Kombatente Libertasaun Nasionál, Gil da Costa Monteiro ‘Oan Soru’ informa veteranu ne’ebé rejista iha tinan 2009 hamutuk rihun atus-ida, rua nulu resin haat, atus neen (124.600) tama iha iha verifikasaun ne’ebé tuir planu sei verifika iha setembru, tinan  ida ne’e.

Governante ne’e informa, hosi númeru ne’e inklui mártir sira iha funu ba libertasaun, maibé verifikasaun mak sei fó serteja.

“Veteranu sira ne’ebé rejista iha 2009 hamutuk 124.600 resin. Ida ne’e rejistadu, maibé verifikasaun iha setembru mai mak sei justifika veteranu loos ka lae,” Gil ba Agência TATOLI iha Caicoli, segunda (03/6/2019).

Nia dehan, loloos ne’e prosesu verifikasaun hahú iha 1 jullu, maibé tanba atividade selebrasaun 30 agostu besik ona, entaun adia ba setembru.

Nia esplika, programa verifikasaun ne’e sei la’o durante loron 326 hodi perkore territóriu nasionál, maibé data loloos seidauk determinadu.

Sekretáriu Estadu ba Asuntu Kombatente Libertasaun Nasionál, hateten, verifikasaun ne’e la’o dezde uluk kedas, hafoin rejista iha 2003 no 2005 nian.

“Balun dehan veteranu falsu, maibé balun veteranu duni. Verifikasaun ida agora ita afina tan uituan. Buat balun la’o ona iha liu-ba kotuk ladún di’ak, ita presiza kurije,” nia esklarese.

Gil haktuir, veteranu sirta ne’ebé rejista iha 2003 kuaze rihun 29, balun rezolve ona no balun seidauk.

Tanba ne’e, nia haklaken, ekipa verifikasaun sei tuir formasaun hafoin tún ba territóriu nasionál no sei ba halo juramentu ba Jardín Eroi Metinaro.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here