Ilustrasaun

DILI, 04 juñu 2019 (TATOLI) – Uniaun Europeia (UE) liuhusi nia embaixadór iha Timor-Leste, Embaixadór Alexandre Leitão hamutuk ho Reprezentante Organizasaun Nasaun Unida (ONU), Roy Trivedy hasoru malu ho Primeiru-Ministru (PM), Taur Matan Ruak hodi ko’alia kona-ba forma atu halakon violénsia hasoru feto.

Embaixadór Uniaun Europeia (UE) iha Timor-Leste, Alexandre Leitão informa, reuniaun ohin hodi aprezenta ba Xefe Governu kona-ba aprovasaun planu ida husi UE no ONU, hanesan planu ambisiozu iha istória hodi kombate violénsia doméstika kontra feto.

Embaixadór Uniaun Eropeia iha Timor-Leste, Alexandre Leitão. Imajen António Goncalves

“Hanesan projetu globál ba país hotu ho fundu millaun €500, no bainhira fó sai ba públiku iha tinan hirak liubá, ami (EU no ONU) tenta atu Governu Timor-Leste bele hola parte no bele iha jestaun rasik iha ne’e. Governu Timor-Leste liuhosi Ministru Negósiu Estranjeiru no Kooperasaun, Deonísio Babo hamutuk ho UE no ONU kolabora no serbisu hamutuk hodi bele realiza duni,” tenik ba jornalista sira iha Palásiu Governu, tersa ne’e.

Nia haktuir, programa ne’e aprovadu ona iha semana hirak liubá no Timor-Leste sei iha parsela autónoma millaun €12 ne’ebé sei uza durante tinan tolu nia laran, hodi tenta dezenvolve asaun konkreta ho Governu no sosiedade sivíl liu-hosi sistema edukativu, Polísia, Organizasaun Naun Govermentál (ONG) sira, para bele hamenus violénsia doméstika ne’ebé pratikamente sempre akontese ba inan-feton sira.

Nia dehan tan, projetu ne’ebé asina ona iha tinan kotuk entre UE no ONU, halibur kompaktu mundiál hotu no agora projetu ne’e aprovadu iha kada país ou rejiaun, nune’e Timor-Leste iha semana kotuk deside ona katak sei sai benefisiáriu ba projetu espesífiku.

“Agora ko’alia ho Governu no ONU hodi hamutuk bele deside asaun saida de’it mak sei halo durante tinan tolu nia laran, ami hahú daudaun ona. Tanba ne’e, ami mai aprezenta ba Primeiru-Ministru, no informa katak prosesu negosiasaun no aprovasaun halo ona, no agora tenke servisu para bele hetan rezultadu di’ak”, katak tan embaixadór ne’e.

Iha parte seluk, Koordenadór Rezidente ONU, Roy Trivedy hateten, ida ne’e hanesan oportunidade di’ak ba Timor-Leste tanba hanesan planu asaun ida hodi hamenus problema ne’ebé grave iha Timor-Leste no mós nasaun seluk tan iha mundu.

“Problema iha família nia laran ne’ebé afeta ba família seluk, ba komunidade, nasaun no dezenvolvimentu. Entaun ami hamutuk ho parseiru govermentál no sosiedade sivíl sira tenta atu halo planu di’ak ida atu hamenus ou elimina problema violénsia doméstika kontra inan-feto sira,” konsidera reprezenta ONU ne’e.

Nune’e mós nia konsidera, problema violénsia doméstika kontra feto difisil tebes atu hetan rezultadu di’ak maibé parte ONU hamutuk ho EU tenta no sei halo planu importante ida kona-ba kestaun ne’e, tanba hanesan asuntu grave ne’ebé afeta sosiedade no família timoroan, nune’e mós iha país seluk.

“Iha Timor-Leste grave ona tanba ne’e ita tenke tenta ajuda problema ne’e,” dehan tan Koordenadór Roy Trivedy.

Lee mós notísia: http://www.tatoli.tl/2019/02/ue-apoia-mill-e215-ba-kapasidade-institusional-tl/

http://www.tatoli.tl/2018/12/uniao-europeia-no-sosiedade-sivil-timor-leste-asina-kontratu-reforsa-projetu-haat/

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here