Sekretáriu Estadu ba Asuntu Kombatente Libertasaun Nasionál, Gil da Costa Monteiro 'Oan Soru'. Imajen António Gonçalves

DILI, 3 maiu 2019 (TATOLI)—Sekretáriu Estadu ba Asuntu Kombatente Libertasaun Nasionál, Gil da Costa Monteiro ‘Oan Soru’, hateten Timor-Leste (TL) sei konvida xefe estadu no xefe governu balun partisipa iha selebrasaun loron konsulta populár ba dala-20.

“Loron 25-28 agostu ita sei simu bainaka espesiál sira ne’ebé mai hosi nasaun sira seluk, hanesan señór Primeiru Ministru sei konvida ninia amigu membru governu ho xefe governu sira, señór Prezidente Repúblika konvida xefe estadu sira,” Gil ba Agência TATOLI iha nia kna’ar fatin, Caicoli, Dili, segunda (03/6/2019).

Nia dehan, selebrasaun loron konsulta populár ne’e sei to’o 4 setembru, tanba iha 4 setembru, kuaze iha territóriu nasionál hasoru sofrementu oioin hafoin rona rezultadu katak lae ba autonomia no sim ba referendu.

Maibé, Prezidente Repúblika, Francisco Guterres Lú Olo ho Primeiru Ministru, Taur Matan Ruak mak sei fó sai ba públiku kona-ba xefe estadu no xefe governu hosi rai-li’ur ne’ebé atu partisipa iha selebrasaun tinan 20 loron konsulta populár ne’e.

Gil hatutan, oras ne’e, prosesu komunikasaun la’o hela, tanba sei hela fulan-tolu no sé-sé mak sei partisipa sei fó sai ba públiku.

Tuir The Guardian, iha eleisaun 30 agostu 1999, timoroan na’in 344,580 (78.50%) rejeita autonomia ka hakarak ukun rasik-aan no na’in 94,388 (21.50%) hili autonomia ka hili hamutuk ho Indonézia. Totál votu hamutuk 438,968 (100%).

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here