Imajen hosi google.

DILI, 4 Juñu 2019 (TATOLI) – Susubeen lata ka fórmula provoka moras krónika ba labarik lalais liu duke susubeen inan nian, tanba ne’e susubeen inan importante tebes ba bebé no labarik sira ne’ebé idade sei presiza inan nian susubeen.

Reprezentante OMS iha Timor-Leste, Rajesh Pandav. Imajen Egas Cristovão

“Susubeen inan prevene badak, labarik badak sira moras beibeik, lakon oportunidade atu aprende, sira sei la dezenvolve didi’ak iha eskola, no bainhira sira boot sei iha dezvantajen ekonómika barak, no sira iha tendénsia liu atu hetan moras króniku”,  reprezentante Organizasaun Mundiál Saúde (OMS) iha Timor-Leste, Rajesh Pandav, hatete iha semináriu ida iha otél Timór, ohin.

Lideransa másimu OMS ne’e esplika benefísiu seluk husi susubeen inan inklui ambiente amigavel. Labarik no adolexente sira ne’ebé uluk susu de’it inan nia susubeen sei la iha tendénsia atu bokur ka obezidade.

Nia akresenta susubeen inan dezempeña di’ak liu iha teste ba intelijénsia no frekuénsia atende eskola ho di’ak, sei asosiadu ho rendimentu aas iha sira nia vida adultu.

Atu hadi’ak labarik ida nia dezenvolvimentu no redús kustu ba saúde, nia dehan sei hetan benefísiu ekonómiku ba família no indivíduu, nune’e mós iha nivel nasionál. Maske iha ona evidénsia barak kona-ba benefísiu susubeen inan ba inan no bebé, iha nivel global, iha de’it labarik ho idade menus fulan neen porsentu 40 mak susu eskluzivu inan nia.

“Iha Timor-Leste iha redusaun iha susubeen inan eskluzivu husi porsentu 62 iha tinan 2013 ba porsentu 50 iha tinan 2016. Timór-Leste mós iha persentajen aas liu iha mundu ho labarik ra’es badak. Entre labarik na’in ida husi labarik na’in rua idade menus husi tinan lima mak sofre ra’es badak – ne’e reprezenta metade husi labarik hotu pursentu50.2”, katak nia.

Ne’e duni, importante tebes ba Timor-Leste atu foti medida hodi promove fó inan nia susubeen maka finaliza Kódigu Internasionál Merkadoria ba Lejizlasaun kona-ba susubeen inan iha Timor-Leste hahú fó susubeen inan ba kosok-oan iha kedas oras ida nia laran; fó susubeen inan eskluzivu, inan nia susubeen loos de’it – hanesan beibeik, tuir kosok-oan sira hakarak, loron no kalan; lalika uza biberón no xupeta; promove Inisiativa Hadomi Kosok-oan hodi fortaleza no haktuir prátika hodi inan sira bele fó susu ba bebé ka labarik sira.

“Importante tebes atu implementa inteiramente Kódigu Internasionál Komersializasaun ba Substituisaun ba Susubeen inan. Kódigu ne’e fó advokasia katak kosok-oan sira tenke fó inan nia susubeen. Se labarik la susu inan nia susubeen, tanba razaun saida de’it,  Kódigu ne’e mós defende katak ai-han ne’ebé ita fó ba labarik sira ne’e tenke seguru no iha nutrisaun ne’ebé di’ak liu ba sira. Susubeen substitutu ka susubeen artifisiál disponivel bainhira ita presiza, maibé lalika promove”, subliña nia.

Rajesh Pandav esklarese liu tan kódigu ne’e halo parte importante ida atu estabelese ambiente jerál ida ne’ebé fasilita inan sira atu foti desizaun ne’ebé di’ak liu, bazeadu husi informasaun imparsiál no livre husi influénsia komersiál, hodi bele hetan apoiu tomak kona-ba desizaun ida ne’e. Merkadoria ba produtu ai-han ne’ebé la apropriadu no kompete ho susubeen inan, ne’e fatór ida ne’ebé afeta inan nia preferénsia ideal atu fó susu ba kosok-oan.

Haree ba kosok-an sira nia vulnerabilidade no risku husi fó ai-han tuir prátika ne’ebé la apropriadu; prátika komersializasaun ohin loron nia ne’e la adekuadu ba produtu sira ne’e.

OMS forma tiha ona Rede ida ba “Global Monitoring and Support for Implementation of the International Code of Marketing of Breast-milk Substitutes and Subsequent Relevant World Health Assembly Resolutions” koñesidu hanesan NetCode.

Objetivu NetCode ne’e atu proteje no promove susubeen inan, no asegura atu labele promove susubeen substitute la apropriadu. NetCode, kria hela, espesífikamente, kapasidade Estadu Membru sira no sosiedade sivíl atu foti medida hodi hapara violénsia hotu-hotu.

Prátika fó susubeen inan responde tebes ba intervensaun no bele hadi’ak prevalénsia fó susubeen eskluzivu no kontinua fó susubeen inan ba labarik ba tinan hirak mai oin.

 Susubeen inan ne’e la’ós de’it investimentu ida atu hadi’ak no salva labarik nia vida, maibé mós, ne’e investimentu ida ba dezenvolvimentu kapitál umanu no benefísiu ida ba nasaun nia ekonomia. Susubeen inan ne’e investimentu di’ak liu ida iha saúde global: kada dolar ida ($1)  ne’ebé ita investe ba susubeen inan, bele jera fali $35 ba retornu ekonómiku.

Kustu orsamentu ba ema sira ne’ebé la tuir prátika fó susubeen inan ne’e aas tebes. Tuir estimasaun nivel global katak, kada tinan iha labarik sira idade menus husi lima liuhusi 820,000) no feto sira kuaze 20,000 mak mate rezultadu husi la fó susu ba kosok-an sira.

Iha estudu foin lalais ne’e analiza no sujere tanba de’it iha fallansu atu suporta inan sira fó susu ba sira nia kosok-an, halakon biliaun dolar ba ekonomia nasaun nian.

iha fatin hanesan, Diretora Jerál Prestasaun Saúde, Odete Viegas, hateten Ministériu Saúde sei koordena ho ministériu kompetente atu hapara importasaun susubeen fórmula.

Diretóra Jerál Prestasaun Saúde Ministériu Saúde (MS), Odete da Silva Viegas. Imajen Egas Cristovão

“Daudaun ne’e Kódigu Internasionál Komersializasaun iha parte finál, inan hothotu la’ós iha situasaun ekonomia di’ak entaun obriga sira sosa susubeen fórmula, ne’ebé ami sei koordena ho ministériu kompetente atu regula susubeen ne’ebé apropriadu hodi importa mai ou ministériu saúde sei fó kritériu”, hateten Odete Viegas.

Odete Viegas dehan bebé ne’ebé foin moris inan sira tenke duni fó susubeen formula tanba iha situasaun balu obriga, hanesan kondisaun saúde, no kondisaun ekonomia.

 Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here