Sekretáriu Estadu Arte no Kultura, Teófilo Caldas. Imajen Tatoli/António Gonçalves

DILI, 4 maiu 2019 (TATOLI)Bazeia ba lei orgániku ministériu nian, Sekretaria Estadu Arte no Kultura (SEAK) halo mudansa ba estrutura tuan hodi troka ho figura foun sira ne’ebé iha ministériu nia laran, sai hanesan motivasaun ida hodi bele atinje objetivu ba serbisu ida ne’ebé efisiénsia no efikásia.

“Ami halo duni mudansa uituan ba iha estrutura maibé ami la lori funsionáriu sira mai hosi ministériu seluk. Ami halo de’it mudansa uituan iha estrutura tuan. Maibé, ne’e ho objetivu ida atu bele serbisu ho efisiénsia no efikásia. Mudansa ne’e hanesan motivasaun ida ba sira para bele iha vontade liu-tan hodi halo sira-nia kna’ar hanesan serbidór estadu, serbidór nasaun no serbidór ba povu,” tenik Sekretáriu Estadu Arte no Kultura, Teófilo Caldas, ba jornalista TATOLI liuhui entrevista iha nia kna’ar fatin, Avenida Portugal, Dili, ohin.

Nia hatutan, mudansa estrurura ne’e mai hosi figura foun hodi muda figura sira ne’ebé mak hosi diresaun nasionál ba fali diresaun jerál no diresaun jerál ba fali diresaun nasionál. La signifika katak mai ho intensaun ida atu troka ema ida ne’e tanba kór polítika ka ideolojia la hanesan. Maibé, ninia objetivu prinsipál mak hanesan motivasaun ida ba sira para bele efetivu liu-tan no bele atinje meta serbisu ida be efisiénsia no efikásia.

“Normalmente ema-nia interpretasaun la’o ba ne’ebá maibé realidade lahanesan ne’e. Halo mudansa la’ós tanba kór polítiku la hanesan maibé motivu hosi halo mudansa ne’e mak atu bele atinje de’it efisiénsia no efikásia serbisu ne’e,” nia dehan.

Mudansa ba estrutura, Teófilo informa, laiha impaktu tanba entre sira ho sira koopera malu ho kapa’as. Se lori ema seluk hosi li’ur ka ministériu seluk ne’e mak mai lidera ne’e fó impaktu tanba ema iha laran lakohi koopera.

Nia haktuir, hosi juñu 2018 to’o agora, SEAK alkansa programa lubuk ida tanba kooperasaun hosi diresaun sira iha SEAK laran la’o ho responsabilidade. Susesu lubuk ida  maka SEAK konsege finaliza projetu konstrusaun drainazen ho moru biblioteka nasionál nian, realiza festival loron nasionál kultura iha 14 outubru 2018, halo lamsamentu livru uma lulik iha Marrobo- Bobonaro no realiza serimónia rituál liliu harii fila fali ai-to’os iha Farol.

 

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here