Foto espesiál

DILI, 04 Juñu 2019 (TATOLI)- Ministru Negósiu Estranjeiru no Kooperasaun (MNEK), Dionísio Babo Soares akompaña husi Diretór Jerál ba Asuntu ASEAN (Organizasaun ba Nasaun Sudeste Aziátiku), Jorge Camões, Diretora ASEAN ba Pilár Ekonomia, no Xefe Gabinete  MNEK, hahú vizita ba nasaun membru ASEAN sira.

Vizita hala’o dahuluk ho Tailándia hafoin vizita ba Kambodia. Vizita ne’e hahú husi fulan maiu to’o fulan jullu tinan ida ne’e.

Iha vizita ne’e, diplomata timoroan hasoru malu ho nia omólogu Tailandés, Don Pramudiwinai hodi ko’alia kona-ba kooperasaun bilaterál no multilaterál entre Timor-Leste ho Tailándia, nune’e mós kona-ba Tailándia nia apoia ba Timor-Leste atu sai hanesan nasaun membru ASEAN.

Iha oportunidade hanesan, Tailándia mós sei fó apoiu nafatin ba Timor-Leste iha área edukasaun nian, liuliu apoiu bolsa estudu ba timoroan sira iha nivel universidade.

Hafoin vizita ba iha Tailándia, Ministru Negósiu Estranjeiru no Kooperasaun, Dionísio Babo Soares ho nia Komitiva halo vizita ba iha Kambodia hodi hasoru malu ho Primeiru-Ministru, Reinu Kambodia, Samdech HUN SEN iha nia kna’ar fatin Palásiu da Paz Kambodia, iha loron 03/06/2019.

Iha hasoru malu ne’e lider na’in rua ne’e diskute kona-ba adezaun Timor-Leste nian ba membru ASEAN.

Iha oportunidade ne’e, Ministru Negósiu Estranjeiru no Kooperasaun Timor-Leste, Dionísio Babo Soares hodi Governu Timor-Leste nia naran husu apoiu husi nasaun refere.

Hanesan nasaun viziñu, Kambodia la iha dúvida hodi kontinua apoiu Timor-Leste sai membru ASEAN. Nune’e Primeiru-ministru Kambodia, Samdech Hun Sen hateten, iha nia vizita mai Timór tinan 2016 nia haree katak Timor-Leste iha kondisaun ne’ebé hanesan ho Kambodia bainhira sai membru ASEAN.

Alende, koalia kona-ba Adezaun Timor-Leste ba membru ASEAN, Governante na’in rua ne’e mós ko’alia kona-ba kooperasaun bilaterál balun entre Timor-Leste ho Kambodia ne’ebé maka halai ba iha área ekonomia, turizmu no edukasaun.

Iha sorumutu ne’e, Ministru Dionísio Babo Soares realiza enkontru ho Adjuntu Primeiru-ministru no Ministru Negósiu Estranjeiru, Reinu Kambodia, Park Sokhonn hodi ko’alia kona-ba asuntu preparativu balun ba prosesu adezaun ba ASEAN.

Ministru Park Sokhonn informa katak iha ona konkordánsia husi nasaun membru ASEAN sei tuur hamutuk hodi foti desizaun ba Timor-Leste nia aplikasaun sai membru ASEAN ba dala sanulu resin ida.

Iha oportunidade ne’e, Ministru Negósiu Estranjeiru no Kooperasaun, Dionísio Babo Soares apresia tebes prezensa ekipa avaliasaun ne’ebé sei mai iha tempu badak, no prontu kolabora ho ekipa refere hodi fornese dadus no informasaun ne’ebé Timor-Leste presiza.

Nune’e, Ministru Dionísio mós salienta liu tan katak governu Timor-Leste estabelese ona grupu serbisu ne’ebé kompostu husi liña ministeriál sira relevante no grupu refere maka sei fornese xave informasaun ba ekipa avaliasaun.

Enkontru ne’e parte husi vizita ofisiál ASEAN tour husi Ministru Negósiu Estranjeiru no Kooperasaun, Dionísio Babo Soares, ne’ebé hahú uluk husi Reinu Tailándia no Cambodia no sei kontinua ba Laos, Vietnam, Myanmar, Malázia, Brunei Darussalam no Singapura.

Lee mós: http://www.tatoli.tl/2019/05/mnek-sei-vizita-nasaun-membru-asean-hametin-kooperasaun/

(KI MNEK)

HAKEREK NO HATÁN

Please enter your comment!
Please enter your name here