Arquimino Ramos.

Husi;

Arquimino Ramos, S.Sos, B.Bus, MM

Istoria Polisia sipil hari iha 1829 iha Inglatera husi Sir. Robert Peel ho naran London Metropolitan Police no nasaun sira seluk mos forma sira nia Polisia hafoin tinan 150 mai oin. Papel Polisiamentu iha TL Antes Kolonial Portugal seidauk iha instituisaun polisia maibe iha momentu nebaa morador sira liurai nian maka halao funsaun polisia atu garante seguransa no asegura desizaun liurai ho nian ukun. Iha Administrasaun Portugal iha ona polisia seguransa publika (PSP) no iha Polisia SIPAI nebee koloka iha posto Administrativu no administrasaun konselhu. Iha Tempu okupasaun Indonesia ezistensia Polisia Republika Indonesia (POLRI) nebee rekruta mos Timor oan barak sai membru POLRI nebee balun ohin servi nafatin iha PNTL. Iha era Independensia Polisia harii husi ONU ho naran Timor Lorosae Police Service (TLPS) iha 2001 transforma ba East Timor Police service (ETPS) to iha tinan 2004 maka muda naran Polisia Nasional Timor Leste (PNTL) ho Decretu lei numeru 8/2004.

Dezelvolvimentu iha aspetu moris nian iha mundu laiha ida maka nafatin to nia rohan inklui seitor seguransa nebee afeta ema nia moris no ema barak kolia iha era ohin konaba  reforma iha seitor ida nee. Reforma katak atividade hotu nebee halao atu halo mudansa (To change), halo perfeitu (To Perfect) no moderniza (To modernize) buat ruma. Iha aspeitu tolu reforma nian maka hanesan struktural, instrumental/legal no kultural. Primeiru Aspetu Struktural kolia konaba Papel Instituisaun, kompetensia, funsaun. Segundu aspetu Instrumental/legal nebee kolia konaba Lei, Regras, Sistema, prosedimentu. No terseiru aspetu kultural maka Kultura moris (budaya), Kustume (kebiasaan) no hahalok(perilaku). Objetivu reforma tuir Drorr, 2002 maka atu Profesionaliza instituisaun, iha Efisiensia, iha Efikasia, boa governasaun nomos halao knar tuir lei no povu nia espetativa (people expectation). Reforma sira nee presiza halao iha instituisaun hotu-hotu inklui Polisia Nasional Timor-Leste.

Filosofia polisiamentu tuir Anneke osse. 2007(Polisiamentu otoriter/militarismu, polisiamentu komunitaria, polisiamentu iha krize, polisiamentu baseia ba problema (problem base policing) no polisiamentu baseia ba informasaun(information base policing). Timor Leste adopta Polisia Komunitaria tuir decreto lei numeru 9/2009 16 de Marsu ho motto; VIP Vizivilidade, involvimentu no profesionalismu.  Iha parte seluk Timor Leste iha ona Lei Seguransa No.2/2010, Lei seguransa interna No.4/2010 nebe kolia konaba Kooperasaun instituisaun seguransa iha TL, papel no kompetensia instituisaun defesa no seguransa nian. iha mos Lei organika PNTL No.9/2009 kolia konaba Papel, strutura, kompetensia no filosofia PNTL no  Regulamentu disiplinar PNTL iha Dekretu Lei L No.8/2004 kolia konaba Deveres sira PNTL nian.

Polisia hanesan instituisaun estadu nebee iha knar atu garante sidadaun sira nia seguransa inklui propriedade sira tuir Konstituisaun RDTL artigu 147.  Seguransa mai husi Lingua Latina:  Securus, Se;Laiha, Curus; tauk, signifika la tauk ka laiha tauk. Seguransa katak; Abilidade atu mantein soberania no independensia ho Kondisaun moris nebee laiha ameasa no tauk. Iha parte seluk Profesionalismu tuir Samuel huntinton; iha Badaen (Expertice), Espirito de corpo (team work), Responsabilidade sosial(social responsibility). Iha mos Farouk Muhamad nia hanoin maka polisia professional katak Polisia nebee iha disiplina, efisiensia no efikasia.

Polisia profesional katak Polisia nebe halao knar tuir lei jeral nasaun nian, Sistema no prosedimentu  intituisaun nian no hetan konfiansa husi nia komunidade atu garante sira nia seguransa no stabilidade.

Iha sorin seluk Tuir Padraun ONU ba Law enforcement agencies 1979; atu profesionaliza instituisaun seguransa presiza iha investimentu iha area Edukasaun, Treinamentu, equipamentu, motivasaun no salariu ka babain temi  5W (Well Educated, well Trainning, well Equiped, well-Motivated, well Sallary).

Dezelvolvimentu no Jestaun Rekursu humanus Polisia Nasional Timor Leste

Funsaun rekursus humanus instituisaun nian maka jere prosesu hotu-hotu liga ba pesoal siara nia bens star ka moris diak hodi fornese servisu nebee diak. Prosesu sira nee maka hanesan; Rekrutamentu, Formasaun, Kolokasaun, Promosaun no Pensaun. Hanesan nasaun foun no instituisaun foun presiza iha esforsu makaas hodi dezenvolve iha area hotu-hotu inklui dezenvolvimentu rekursu humanu. Tuir mai ami sita mudansa ka reforma balu nebee akontese iha instituisaun PNTL hahu husi nia ezistensia iha 27 Marsu 2000 too agora;

Rekrutamentu tempu ONU husi 2000-2004; honia kriteria selesaun maka hanesan tuir mai nee; ezame fizika, intervista, izame medika maibe laiha junta medika. Izame laduun rigor tanba ONU ho tempu badak atu establese Polisia no entrega poder polisia lalais ba PNTL. Iha tempu ida nee iha rekrutamentu ba polisia regular nebee mai husi joven sira nebee hakarak rasik priense formulariu no tuir izame admisaun no tuir formasaun ho durasaun fulan 3 iha Kolegio Polisia Nasional Timor leste nian, iha 2003 iha mos desizaun husi Ministro Interior Sr Rogerio Lobato hatama mos joven lubuk ida husi veteranus no ex klandestina sira hodi integra iha formasaun hodi sai membru Polisia. Iha tempu hanesan rekruta mos Timor oan nebee iha tempu okupasaun integra iha POLRI ka Polisia Indonesia iha nebe sira tuir deit formasaun ba fulan ida deit hodi halao kedas knar Polisia hamutuk ho Polisia ONU. Sistema rekrutamentu ida nee haktuir prosesu rekrutamentu polisia sivil iha Australia ho Nova Zelandia nebee UNTAET implementa.

Hafoin krize 2006 laiha tan rekrutamentu too reforma tiha Sistema Rekrutamentu iha kooperasaun teknika ho Militar GNR husi 2011 too agora, kriteria ba  selesaun maka hanesan; Prova kultural ka eskrita, Izame dokumental, prova medika, prova aptidaun fizika, prova psikolojia, intervista profisional. Sistema rekrutamentu nee haktuir Sistema rekrutamentu militar nebee GNR aplika iha Portugal no Brazil. Prosesu rekrutamentu foun nebee krdivel, iha transparansia no bazeia ba merito iha tempu hanesan  laiha fatin mos ba parte hotu atu halo KKN.

Formasaun

Formasaun tempu ONU ho kurikulu UN prepara no implementa husi 2000-2004 ho durasaun fulan 3 uza metotu andragojia nebee aplika iha Australia no nasaun Common wealth sira seluk. Maske nunee iha kritikas no sujestaun barak husi sosiedade sivil konaba durasaun formasaun nebee badak tanba sira akompanha formasaun Polisia durante okupasaun Indonesia nebee ho durasaun fulan 6 ba leten.

Formasaun ho kurikulu nebe dezena ho apoiu AFP husi 2004-2006 ho durasaun fulan 4 no uza metodu andragojia. Instrutor nudar fasilitador no instruendu sira partisipa ativu iha aulas liu husi diskusaun grupo, atividade pratika no apresentasaun. Kurikulum ba formsaun ida nee aplika mos iha Australia, Amerika, Inglatera, Canada no seluk-seluk tan. Iha  Australia no Nova Zelandia formasaun baziku polisial ho durasaun fulan 3 maibe sira nia organizasaun sai melhor organizasaun polisia iha mundo ka Top Ten Police organization.

Formasaun ho kurikulu apoiu tekniku GNR ho durasaun fulan 9 uza metodu pedagojia, metodu nebee instructor maka ativu liu iha aulas no instruendo sira rona deit no husu klarifikasaun wainhira la kumpriende. Kursu primeiro too dahaat iha kolaborasaun entre instructor GNR no PNTL inklui Kursu sajentu ba dahuluk nebee partisipa mos membros Polisia husi CPLP maka hanesan Guine Bissau no Sao Tome e Prinsipe hamutuk nain 7.

Kurikulum atual formasaun baziku ho durasaun fulan 6 nebee ho modulu 4 maka hanesan modulu juridiku, Modulu Tekniku Polisial, Modulu  Fiziku no Tiru no Modulu jeral. Kursu ba dalima nee instrutores PNTL maka hanorin tomak ho asesoria husi GNR.

Presiza iha politika formasaun nebee propriu ba Polisia Nasional Timor Leste tuir kondisaun, realidade rasik no la haluha prinsipiu internasional nebee aplika universal. Politika formasaun tenki tuir interese nasional no ameasa potensial nebee iha.

Kolokasaun;  tuir kompetensia nebee hatuur iha lei organika PNTL, Kompetensia Komandante Jeral hodi nomeia Komandante Unidade, Municipio no Departementu sira inklui halo transferensia membro husi Unidade ba unidade no Munisipiu hanesan unidade territorial PNTL. Kompetensia Komandante Unidade no Municipio sira maka nomeia Komandante Esquadra no seksaun sira inklui halo transferensia  iha Municipio no Unidade nia laran ho aprovasaun Segundo Komandante Jeral da PNTL. Kolokasaun bazeia ba meritu (The right men on the right place) tuir nesesidade organizasaun ho durasaun nebee seidauk defini  iha politika propriu ba kolokasaun no dezenvolvimentu kareira PNTL nian.

Promosaun; tempu ONU( UN Admin best pratice Manual) bazeia ba rekomendasaun meritu husi komandante Distritais, unidade no seksaun sira hodi tuir kursu promosaun no nomeia kargu komandu no xefia sira. Promosaun provisoriu (Provisory Rank) Sub-inspector no Inspector hodi kaer komandu Esquadra, Unidade, Distrito no Departementu sira, promosaun sira nee hahu husi 2001 too 2005. Maske nunee laiha selesaun nebe rigor ho Sistema nebee klaru atu satisfas membro tomak ba prosesu promosaun.

Promosaun tuir Lei No 16/2009. Promosaun normal honia kriteria ba selesaun hanesan tuir mai; Prova  dokumental, eskrita, fizika, medika, intervista no kursu ba promosaun. Sistema promosaun nee aplika hahu husi promulgasaun dekretu lei nee iha tinan 2009 hanesan parte ida husi reforma nebee governu Aliansa Maioria Parlamentar 2007-2012 lidera husi Primeiro Ministro Xanana Gusmao iha tempo neba.

Promosaun transitoria 2010 aplika deit, selesaun dokumentus, izame eskrita, psikolojia, intervista no laiha kursu ba promosaun ida nee tanba atu priense vaga sira nebee mamuk wainhira halo mudansa husi nivel divisa  5 iha tempu UNTAET ba nivel 12 tuir lei organika foun. Prosesu promosaun involve peritos internasional husi Australia, Singapura, Malaysia no seluk tan. Prosesu nebee transparante, kompetitivu bazeia ba merito no laiha intervensaun husi parte seluk.

Pensaun sei defini iha statuto PNTL nebe iha ona esbosu hodi hatoo ba governu hodi bele sai dekretu lei ba Statuto nebee define mos Pensaun ba membro Polisia Nasional Timor Leste. Agora dadauk  iha ona lei jeral ba reforma nebe konsagra iha rejime jeras seguransa social  (Tinan 60 bele aplika). Presiza iha politika instituisaun atu prepara membro sira antes ba pensaun hodi sira iha ligasaun nafatin ho instituisaun Polisia wainhira sira reforma hanesan kapasitasaun ba membro sira iha area karpintaria, Negosiu, kostura no seluk-seluk tan tuir idak-idak nia talentu ka bakat.

Sistema sira ami sita iha leten hahu husi rekrutamentu, formasaun, kolokasaun, promosaun no pensaun hahu diak tuir padraun internasional nebee aplika iha mundu maske iha nafatin nesesidade atu halo mudansa tuir kondisaun Timor leste nian no la tau ba kotuk pratika diak nebee aplika internasional (international best practice) hodi Evita hahalok nebee kontra lei no ita hotu la hakarak.

Hakerek nain  Pos Graduado Estudo Estrategico e Resiliencia Nacional- ISCSP-Universidade Lisboa  e Doutorando iha Gestao Estrategico UNPAZ nomos dosente iha Universidade da Paz.

Opiniaun ne’e la reprezenta editorial TATOLI, I.P. Kontiudu tomak, responsavel hakerek nain nian.

HAKEREK NO HATÁN

Please enter your comment!
Please enter your name here