Diretóra Jerál Prestasaun Saúde Ministériu Saúde (MS), Odete da Silva Viegas. Imajen Egas Cristovão

DILI, 4 juñu 2019 (TATOLI) – Diretora Jerál Prestasaun Saúde, Odete Viegas, hateten programa saúde família iha progresu tanba partisipasaun komunidade másima.

 “Vantajen hosi vizita saúde família boot tebes, tanba komunidade bele asesu ba saúde. Uluk programa ne’e SISKA (Servisu Integradu Saúde Komunitária) ne’e tau de’it meza haat iha sentru saúde no suku maka komunidade mai, maibé saúde família ne’e ekipa saúde nian duni ba uma kain ida-ida, populasaun Timór iha 1.2 milliaun ne’e ami nia profisionál saúde sira tama hotu kedas”, Odete Viegas hateten iha salaun otél Timór, tersa (4/6/2019).

Odete Viegas hatutan hosi vizita ne’e komunidade bele hetan tratamentu di’ak ba sira nia saúde.

 “Vizita Saúde família programa ne’e hahú iha 2015, re-vizita iha tinan 2018. Vizita saúde família iha kritériu haat; saudavel, risku, ema ne’e moras ona, no ikus liu maka ema presiza halo reabilitasaun. Maibé vizita regular ne’e tinan-tinan halo”, afirma Odete.

Progresu ne’ebé hetan hosi programa ne’e maka komunidade sente haksolok no husu atu programa ne’e kontinua.

“Komunidade sira sente haksolok tebes tanba durante tinan barak nia laran sira nunka haree ema saúde no nunka hatene katak saúde nia servisu maka hanesan ne’e no sira bele hetan oportunidade ida ne’e, tan ne’e sira haksolok no sira husu servisu ne’e labele para”, katak nia.

Durante realiza programa ne’e, aleinde fó asisténsia saúde ba komunidade, profisionál saúde sira lori mós difikuldade komunidade nian mai hato’o iha Governu li-liu ministériu relevante.

“La to’o ba ne’e de’it, más ministériu saúde mós haree kondisaun moris komunidade nian, hanesan fata bee, laiha saneamentu, seidauk asesu eletrisidade, estrada, entaun ami konvoka kedas reuniaun ho ministériu relevante hodi fó informasaun no ikus mai iha duni rezultadu pozitivu”, subliña Diretora Jerál Prestasaun Saúde ne’e.

Durante programa ne’e realiza área jeográfika sai difikuldade ba pesoál saúde sira maibé lasai hanesan fatór ida hodi hamate profisionál sira nia vontade, tanba ne’e sai ona responsabilidade nudár kna’ar na’in saúde tenke hodi saúde hakbesik ba komunidade.

Entretantu, programa Saúde família daudaun ne’e kontinua la’o ho rejistu manual hodi hein sistema eletróniku funsiona.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here