Sekretáriu Estadu Arte no Kultura, Teófilo Caldas

DILI, 4 maiu 2019 (TATOLI)—Tuir planu, tinan 2020, Governu liuhusi Sekretaria Estadu Arte no Kultura (SEAK) sei harii Akademia Arte Indústria Kriativu Kulturál (AAIKK) iha Timor-Leste, hanesan loke Ensiñu Superiór ida ne’ebé iha ninia prosesu aprendizajen hanorin de’it kona-ba dansa, múzika ho artesplástiku. Iha tempu badak sei halo inskrisaun ba estudante foun sira.

“Iha outubru 2019 mai ne’e, governu sei halo inskrisaun ka rejistu ba estudante foun sira. Tuir planu, iha inísiu janeiru 2021 bele hahú ona prosesu aprendizajen,” dehan Sekretáriu Estadu Arte no Kultura, Teófilo Caldas, ba jornalista TATOLI liuhui entrevista iha nia kna’ar fatin, Avenida Portugal, Dili, tersa ne’e.

Nia hatutan, governu iha ona planu ne’ebé mak fiksa ona tanba fatin inskrisaun sei uza fatin provizóriu balun. Ba tinan ida ne’e, governu sei aluga Institute of Business (IOB) nia kampus ida iha Praia dos Coqueiros ne’e sai fatin ba inskrisaun.

“Ami ba observa tiha ona. Ami koordena ona. Ninia kustu mak seiduak hatene. Depois ami sei aluga para hodi utiliza ba tinan ida ne’e, hodi hein fatin permanente ne’ebé mak ami sei halo iha Caicoli ne’ebá. Tanba fatin ne’ebá, Sekretaria Estadu Terra no Propriedade atribui ona ba SEAK. En-prinsípiu, iha prosesu inskrisaun ne’e ami sei uza lai IOB nia edifísiu,” nia dehan.

Oinsá kona-ba rekursu umanu, nia hatán, iha rekursu umanu lubuk ida tanba foin lalais ne’e sira loke konkursu públiku ida hetan ema na’in neen—na’in tolu hosi artesplástiku, balun hosi múzika no balun hosi dansa.

“Depois aumenta tan ho ita-nia eis bolseiru timoroan sira ba iha Cuba no Brazíl ne’e. Sira espesialista iha dansa na’in hitu, iha múzika na’in lima, artesplástiku na’in haat. Ne’ebé, ita iha rekursu umanu sufisiente ona atu hahú. Dadaun ne’e, ami kontratu hela Profesór Martin hosi Charles Darwin University (CDU) Austrália, mai brifing hela ita-nia ema sira ne’e para oinsá mak atu sai dosente iha futuru mai,” Teófilo esplika.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here