Asistente Treinadór FIEL, Arcenio Afonso

DILI, 03 juñu 2019 (TATOLI)—Ohin, 04 juñu 2019, kontinuasaun Segunda Divizaun Liga Futeból Amadora (LFA) jornada 3 entre ekipa Fitun Estudante Lorosae (FIEL) ho Kablaki FC ne’ebé sei hala’o iha Kampu Demokrasia, tuku 16:00 otl.

Ba jornalista sira liuhusi konferénsia ba imprensa ne’ebé hala’o iha salaun Xanana Sport Center, Bairru Formosa, Dili, asistente treinadór FIEL, Arcenio Afonso hateten alvu FIEL tenke hadau pontu tolu hosi Kablaki nune’e bele lidera hikas tabela klasifikasaun provizóriu grup A ne’ebe agora dadaun okupa hela hosi Aitana FC.

Treinadór Kablaki FC, Romão Guterres

“Tuir tabela klasifikasaun, ami okupa de’it iha pozisaun terseiru. Ne’e duni, iha jogu aban (4/6/2019), ami iha esperansa boot para manán,” tenik Arcenio.

Maski mehi boot hakarak manán Kablaki, maibé Arcenio konsidera ekipa refere la’ós fásil atu manán tuir sira nia mehi tanba ekipa estimadu hosi Munisipiu Manufahi ne’e mós forte.

 “Kablaki mós ekipa ida ne’ebé unidu. Ami mehi atu manán sira maibé 90 minutu mak termina,” nia dehan.

Iha fatin hanesan, treinadór Kablaki FC, Romão Guterres konfesa katak jogu ne’ebé sira atu hala’o orsida loraik ne’e todan tebes ba sira. Tanba ne’e, sira konsidera jogu refere importante.

“Aban (ohin) ne’e jogu ida ne’ebé todan maibé ami esforsu para bele manán sira nune’e bele hetan fali pontu hodi lidera hikas grup A. Ami pontu agora hanesan ho Fitun Estudante,” dehan Romão.

Treinadór ne’e akresenta, alvu ba sira atu manán FIEL ho rezultadu ne’ebé boot kala difísil maibé bele manán ho pontu ne’ebé mihis.

 “Hanoin ami atu manán Fitun ho rezultadu boot laiha maibé manán mihis (tipis-termu Indonézia). Ami-nia predisaun ne’e  bele manán ho 2-1 ka 1-0,” nia esplika.

Dadaun ne’e Aitana FC mak provizoriamente lidera hela tabela klasifikasaun ho pontu 6, segundu Kablaki ho pontu 4, terseiru FIEL ho pontu 4, kuartu Cacusan ho pontu 1, kintu Porto Taibessi ho pontu 1 no Zebra mak okupa pozisaun sestu ka ikus liu ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here