Komandante Jerál PNTL, Komisáriu Faustinho da Costa. Imajen António Gonçalves

DILI, 4 juñu 2019 (TATOLI)Komandante Jerál (Komjer) Polísia Nasionál Timor-Leste (PNTL), Komisáriu Faustino da Costa sujere ba Governu Timor-Leste atu nomea advogadu timoroan ida atu ba Kúpaun-Indonézia hodi bele defende kazál kondenadu droga JSP no AS.

 “Ami nia proposta mak ne’e, nu-mínimu Governu Timor-Leste sé bele prepara advogadu timoroan ida para bele ba akompaña hodi defende sidadaun timoroan sira nia problema iha Indonézia,” dehan Komisáriu Fuastino ba Agência Tatoli iha kuartel jerál PNTL, Caicoli, Dili, ohin.

Komandante Faustino esplika PNTL rasik seidauk asina akordu extradisaun ho Polísia Indonézia, tanba ne’e kazu kazál rua  ne’e Badan Narkotika Nasional (BNN) mak sei prosesa tuir lei Indonézia nian.

Nia husu ba Estadu Timor-Leste liliu Konsuladu iha Kúpaun no Embaixada Timor-Leste iha Indonézia bele akompañia timoroan rua ne’e nia kazu.

Antes ne’e, Polísia Nasional Serbisu Investigasaun Kriminál (PNSIK) iha loron kinta (30 maiu 2019), kaptura ona suspeitu sidadaun Filipina na’in tolu ho inisial JB nu’udar patraun Kompañia JVK International Movers ho nia espoza M no suspeitu J ne’ebé deskonfia nu’udar na’in ba ai-moruk droga ne’ebé haruka sidadaun timoroan na’in rua, JSP no AS, lori ba Kúpaun-Indonézia.

Entretantu, Tribunál Distritál Dili iha segunda (03/06/2019) liuhusi primeiru interrogatóriu aplika medida kausaun prizaun preventiva ba arguidu JB no fó Termu Identidade Rezidénsia (TIR) ba arguidu M no J hodi hein prosesu investigasaun kontinuasaun.

 

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here