Deputada Bankada CNRT no Prezidente Komisaun G, Albina Marçal Freitas. Imajen espesiál

DILI, 4 juñu 2019 (TATOLI) Komisaun G Parlamentu Nasionál (PN) ba asuntu Edukasaun, Juventude, Kultura no Sidadania, identifika katak,  Rejiaun Administrativu Espesiál Oe-Cusse Ambeno (RAEOA) iha problema orsamentu retroativu ba profesór sira.

“Ami identifika problema setór edukasaun iha Oe-Cusse, maka orsamentu retroativu ne’ebé to’o agora profesór sira seidauk simu,” informa Prezidente Komisaun G, Albina Marçal Freitas, liuhosi plenária, ohin, iha Parlamentu Nasionál.

Komisaun G rona ona hosi Sekretáriu Rejionál Asuntu Edukasaun no Solidariedade Sosiál, Arsénio Bano, katak, atu rezolve problema ida ne’e bainhira governu sentrál transfere ona orsamentu tinan 2019 nian ba RAEOA-ZEESM (Zona Espesiál Ekonomia Sosiál Merkadu).

Ho problema ne’e, Komisaun G husu ba Ministra Edukasaun atu dezloka ba RAEOA atu haree problema setór edukasaun nian tanba ida ne’e ezijénsia hosi profesór sira hosi ne’ebá. Tuir profesór sira katak, bainhira governu sentrál ho autoridade la rezolve asuntu ne’e maka sei akontese greve no sei halo demonstrasaun.

“Agora kabe ba ministra edukasaun atu haree tempu hodi dezloka ba RAEOA, maibé ministra mós subordina hosi primeiru-ministru, tanba ne’e presiza despaxu ruma hosi xefe governu,” hateten Deputada Albina Marçal Freitas.

Komisaun G mós halo ona  enkontru ho ministra edukasaun ne’ebé promete atu ba duni  Oe-Cusse, maibé rona informasaun katak ministra haruka karta ba Prezidente Autoridade RAEOA-ZEESM, mas to’o agora seidauk iha resposta, nune’e ministra to’o agora seidauk ba Oe-Cusse hodi haree problema ne’e.

Jornalista     : Zezito Silva

Editór           : Francisco Simões

HAKEREK NO HATÁN

Please enter your comment!
Please enter your name here