Povu Timor ne’ebé fó sira-nia direitu votu iha Konsulta Populár, 30 agostu 1999. Foto espesiál

DILI, 4 maiu 2019 (TATOLI)—Sekretáriu Estadu ba Asuntu Kombatente Libertasaun Nasionál, Gil da Costa Monteiro ‘Oan Soru’, fó sai katak selebrasaun loron konsulta populár ba dala-20 sei selebra iha territóriu nasionál tomak.

Primeiru-Ministru, Taur Matan Ruak, fó-sai despaixu nú. 04/PM/II/2019 iha loron 18 fevereiru, hili Kay Rala Xanana Gusmão, líder rezistensia timorense sai hanesan prezidente ba komisaun organizadora ne’e, Koordenadór Jerál mak Virgílio Smith no Konselleiru mak Gil da Costa Monteiro ‘Oan Soru’ atuál Sekretáriu Estadu ba Asuntu Kombatente Libertasaun Nasionál.

“Ha’u atu propoin maun-boot Xanana tanba razaun uluk iha tinan 1999, kuandu ita vota tempu ne’ebá, maun Xanana hanesan Prezidente CNRT, liuhosi bandeira hodi ita haketak malu ho Indonézia,” nia dehan ba Agência Tatoli iha nia kna’ar fatin, Caicoli, Dili, segunda (04/6/2019).

Nia informa, orsamentu ba selebrasaun loron konsulta populár ba dala-20 hamutuk millaun-ida resin.

Iha 30 agostu 2019, Timor-Leste komemora aniversáriu Konsulta Populár ba dala-20, iha ne’ebé iha tempu ne’ebá timoroan ezerse sira-nia direitu ba auto-determinasaun no vota ho maioria ba independénsia.

Loron 20 setembru mós marka aniversáriu Forsa Internasionál ka INTERFET to’o mai iha Timor-Leste, hodi hatán ba krize umanitária no seguransa hosi 1999-2000. INTERFET, ho Austrália nia lideransa, involve nasaun 21 ne’ebé halo kontribuisaun importante ba iha tempu susar tebes ida iha istória Timor-Leste nian.

Governu Timor-Leste anúnsia estabelesimentu Komisaun Organizadora ba aniversáriu ne’e no ekipa interministeriál ida, ho kna’ar atu jere no koordena aspeitu hotu ne’ebé relasiona ho eventu aniversáriu ne’e nian.

Nia esplika, selebrasaun loron konsulta populár ne’e hala’o iha munisípiu sira sei hahú iha 31 jullu no loron 24-25 agostu halo fali preparasaun tún mai Dili.

Jornalista: Evaristo Soares Martins

Jornalista: Xisto Freitas

HAKEREK NO HATÁN

Please enter your comment!
Please enter your name here