Hadau malu bola entre jogadór FIEL no Kablaki FC. Imajen/Dok.Mídia LFA

DILI, 04 juñu 2019 (TATOLI)—Hanesan foho Kablaki be hamriik metin, ema seluk dudu la ba. Hanesan Kablaki be ninia lolon naruk, ema seluk lolo ain lolo la to’o. Hanesan Kablaki be aas, só Kablaki de’it mak túr iha Kablaki tutun.

Dadolin iha leten refleta ba Kablaki FC iha Dili. Obra hosi rai Kablaki (Manufahi) ne’e lori rai Manufahi nia naran hatuur aas iha mundu futeból iha Timor-Leste. Sira hetan prestasaun di’ak. Sai primeiru lugár iha tabela klasifikasaun provizória ho pontu 7 iha jornada datoluk Segunda Divizaun Liga Futeból Amadora (LFA) époka 2019.

Kablaki FC hetan prestasaun ida ne’e, hafoin halakon Fitun Estudante Lorosa’e (FIEL) ho rezultadu 2-1 iha jogu kontinuasaun Segunda Divizaun LFA ne’ebé hala’o iha Kampu Demokrasia, Bairru Formosa, Dili, ohin loraik tuku 16:00 otl.

Ekipa rua joga ho sistema ofensivu. Dudu bola ba oin ho rítmu aas atu atinje golu. Halo defeza no baliza hosi ekipa rua hamriik la metin. Okupadu maka’as. Durante minutu 29 nia laran, ekipa rua sateia malu maibé la rezulta golu.

Monu ba iha minutu 30, sinál pozitivu ba Kablaki FC hahú mosu. Sira konsege dudu sees defeza FIEL hodi marka golu primeiru. Golu marka hosi jogadór nasionalidade Indonézia hosi Papua, Inok Bidana (7). Rezultadu hosi ekipa rua sai 1-0.

Ho rezultadu golu ida ne’e, halo ekipa rua serbisu maka’as. Esforsa-án atu halo mudansa ba rezultadu maibé la biban. Ida-idak defende án hodi la fó leet ba seluk atu rezulta tan golu. Jogu primeira parte ramata, laiha mudansa ba golu.

Hakur ba segunda parte, oportunidade ba ekipa FIEL nakloke luan. Iha minutu 59, Alito da Cruz (19), liuhusi ninia skill tiki-taka, fera defeza no lolo guarda rede halo bola sai golu. Nia hetan pasajen bola hosi médiu, Sabino Pereira (14). Golu nakfilak ba 1-1.

Ekipa rua nia luta kontinua klaak. Buka atu hetan pontu tolu (3). Iha minutu 73, jogadór Kablaki, Pedro Borges (17), atinje golu hodi hasa’e tan pontu ba Kablaki. Nia hatama golu ho kabesa liuhusi bola crosing ne’ebé fahe hosi jogadór estranjeiru, Richare Matul (10). Rezultadu sai 2-1.

Maski lakon mihis, jogadór FIEL la lakon esperansa. Sira luta nafatin atu halo balansu ba rezultadu no buka atu manán maibé la konsege. Xutu barak mak avansadu Alito da Cruz (19) lansa maibé xutu hirak ne’e sempre salva hosi guarda rede Kablaki, Albino Pereira (1).

Kablaki mós sente seidauk seguru ho rezultadu ne’e. Tanba ne’e, sira kontinua joga ho ofensivu atu hasa’e liu-tan pontu maibé la fásil. Xutu barak mak avansadu Kablaki, Inok Bidana (7), Pedro Borges (17) ezekuta maibé sempre falla. La kona iha alvu. Hetan salva hosi guarda rede FIEL, Domingos Gama (20). Jogu terminadu ho rezultadu 2-1 no sai hanesan vitória ba Kablaki FC.

Ofisiál FIEL, Crisogno Boavida konfesa katak jogadór hotu hatudu prestasaun di’ak maibé ladún kontrola bola ho di’ak.

“Jogadór sira ami fó treinu di’ak no ohin sira konsege hatudu duni maibé ami falla de’it mak área finál hanesan avansadu mak ladún kontrola xutu,” tenik ofisiál ne’e.

 Maibé, Crisogno promete, ba oin sira sei hadi’a di’ak liu-tan liña hirak ne’ebé falla nune’e labele mosu tan derrota.

Iha sorin seluk, treinadór Kablaki FC, Romão Guterres hateten nia sente kontente tanba mehi ne’ebé nia mehi sai duni realidade.

“Ami kontente ho vitória ohin. Ami orgullu tanba mehi ne’ebé ha’u dehan ami sei manán ho rezultadu 2-1 sai duni realidade,” Romão haktuir.

 Treinadór Ualili-oan hosi rai Kulugisa-Baucau ne’e fó agradese mós ba nia jogadór sira tanba hatudu duni prestasaun di’ak maski sei iha fallansu.

“Agradese tebes ba jogadór sira. Sira joga di’ak maibé ami tenke prepara di’ak liu-tan atu semana oin hasoru Cacusan FC bele manán nune’e hadau malu ho Aitana FC para bele pasa ba primeira divizaun,” nia tenik.

Tuir tabela klasifikasaun provizóriu katak Aitana FC okupa segundu lugár ho pontu 6, FIEL terseiru lugár ho pontu 4, Cacusan kuartu lugár ho pontu 1, Porto Taibessi kintu lugár ho pontu 1 no Zebra FC sestu lugár ho pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here