Teófilo Caldas, Sekretáriu Estadu Arte no Kultura. Imajen Eugénio Pereira

DILI, 4 maiu 2019 (TATOLI)—Atu lori-fila Timor-Leste nia objetu kulturál iha Austrália, governu liuhusi Sekretaria Estadu Arte no Kultura esforsa-án atu kumpri rezolusaun Governu Nú. 25/2011 ne’ebé ko’alia kona-ba protesaun patrimóniu kulturál.

Iha governu anteriór, Sekretaria Estadu Arte no Kultura halo tiha ona kooperasaun ho peskizadór arkeolojia hosi Universdidade Nasionál Austrália, Universidade iha Amérika no Nova Zelándia halo peskiza no halo eskavasaun ba objetu kulturál iha Tutuala-Lospalos, Baucau, Manatuto, Maliana no Ataúro.

Objetu kulturál hirak ne’e halo ona teste laboratóriu ba objetu ne’ebé sira hetan iha rai okos ne’e, prosesu datasaun ramata ona no tau tiha ona tuir tinan. Objetu kulturál sira ne’e, hamutuk tonelada ida ne’ebé dadaun ne’e rai hela ‘Art and Gallery Northeren Territory’ iha Darwin, Austrália no tuir planu sei lori hikas mai Timor-Leste.

“Governu iha planu atu lori fila. Agora ita presiza de’it tempu. Maibé ami esforsu hela, tenke lori fila ita-nia sasán. Sira halo eskavasaun ne’e lori ba laboratóriu iha universidade Austrália ne’ebá atu halo teste para hodi hatene sasán ne’e iha sá tinan. Ita presiza atu lori mai maibé agora primeiru maka ita tenke kria kondisaun intermu fasilidade no edifísiu para sasán sira mai ne’e ita bele tau,” dehan Sekretáriu Estadu Arte no Kultura, Teófilo Caldas, ba jornalista TATOLI iha nia kna’ar fatin, Avenida Portugal, Dili, ohin.

Tanba ne’e, nia dehan, iha programa VIII Governu ne’e Sekretaria Estadu Arte no Kultura sei estabelese mós Muzeu Nasionál ida para bele prezerva objetu kulturál sira ne’e. Dadaun ne’e, iha objetu hamutuk 9484 maka agora rai hela iha espasu ida iha Ministériu Edukasaun hanesan fatin provizóriu.

“Karik ita iha ona Muzeu Nasionál ida, objetu kulturál sira ne’e ita sei tau hotu iha muzeu para bele halo kolesaun no depois sasán sira ne’e sei atrai turista sira ba vizita. La’ós turista estranjeiru de’it maibe turista doméstika sira, estudante sira presiza vizita no halo peskiza oinsá mak sasán ne’e bele iha,” Teófilo informa.

Governu iha planu atu harii muzeu nasionál, nia hatán, tuir planu sei hari iha 2021 tanba SEAK preve osan iha 2020 tuir planu no pragrama SEAK nian. Hafoin ne’e maka governu bele estabelese muzeu nasionál ida iha 2021 iha Dili. Muzeu Nasionál ne’e kualker objetu kulturál ka objetu istóriku sira ne’e, ita tenke prezerva iha ne’eba.

Nia hatutan, foin lalais ne’e Ministériu Justisa liuhusi Sekretaria Estadu Terra no  Propriedade atribui ona eis Muzeu Indonézia nian iha Comoro ba Ministériu Ensiñu Superiór Siénsia Kultura ho SEAK atu rai objetu kulturál.

“Governu halo ona aprosimasaun ba populasaun sira ne’ebe okupa hela iha fatin ne’ebá. Populasaun sira hamutuk iha xefe família 14 mak okupa hela fatin ne’e. Ami identifika hotu ona no ami hanoin hela atu bele fó indeminizasaun uituan para bele rekopera fila fali sira-nia hela fatin ruma atu sira bele ba hela iha fatin ne’ebé mak sira sei muda ba,” Teófilo esplika.

Entretantu, nia tenik, aleinde tau matan liliu ba objetu kulturál sira ne’ebé bazeia ba rezolusaun Governu Nú. 25/2011ne’ebé ko’alia kona-ba protesaun patrimóniu kulturál, iha mós dekretu lei Nú. 33/2017 rejime jurídiku ne’ebé mak ko’alia kona-ba protesaun ka prezervasaun patrimóniu kulturál.

Iha biban hanesan, Teófilo haklaken, maski governu ratifika ona konvensaun Fundu Organizasaun Nasaun Unidade ba Labarik (UNESCO-sigla inglés) nian maibé governu presiza ratifika tan konvensaun 1970 ne’ebé ko’alia kona-ba luta kontra tráfiku illegál ba sasán kulturál sira nian. Sasán ne’ebé ema lori sai ka komunidade fa’an ba rai li’ur, atu lori fila ne’e presiza ratifika tiha lai konvensaun 1970 no konvensaun 1995.

“Hahú hosi ha’u simu kna’ar iha 22 juñu 2018, iha informasaun lubuk ida katak ita-nia objetu kulturál balun nasaun viziñu balun lori ba Indonézia, Austrália, Alemaña, Aústria. Agora esforsu sira ne’e, hanesan membru governu, ita halo esforsu hodi kontatu hela ba iha instituisaun sira ne’ebé maka iha koñesimentu ba ita-nia objetu kulturál sira ne’e, ita hakarak para loron ruma ita tenke lori fila ita-nia sasán,” nia subliña.

Jornalista: Cancio Ximenes

Editór: Xisto Freitas

Lee mós notísia iha kraik ne’e…

Objetu Kulturál Tonelada Ida Sei Rai iha Austrália

HAKEREK NO HATÁN

Please enter your comment!
Please enter your name here