DILI, 04 juñu 2019 (TATOLI)-Prezidente Konsellu Administrasaun Banku Nasionál Komérsiu Timor-Leste (BNCTL-sigla portugés),  Brígido de Sousa, ho nia ekipa, ohin, hasoru malu ho Prezidente Repúblika, Francisco Guterres Lú Olo, hodi fó koñesimentu kona-ba dezafiu BNCTL nian durante ne’e.

Prezidente Konsellu Administrasaun BNCTL, Brígido de Sousa, entrega relatoriu ba Prezidente Repúlika. Imajen/Media PR

Brígido de Sousa, hateten, dezafiu ne’ebé BNCTL enfrenta dezde kedas Timor-Leste enfrenta impase polítika  iha 20017-2018, hodi implika ba funsionamentu banku nian, liu-liu ba mobilizasaun depózitu ho kliente no fó kréditu.

Brídido hateten, BNCTL presiza atu hetan apoiu kapitál osan hosi governu hodi investe, tanba atividade banku ida depende maka’as ba kapitál ho nia filozofia katak, kapitál forte, banku forte.

“Ohin ami ko’alia ho prezidente para bele fó koñesimentu ba Prezidente atu kada tinan presiza hetan kapitalizasaun hosi governu, tanba kapitál forte, banku forte, maibé kapitál ki’ik ema hosi rai li’ur la fiar ita,” hateten Brígido de Sousa, ba Jornalista sira hafoin informa dezafiu ne’e ba Xefe Estadu, iha Palásiu Prezidensiál, Bairru-Pite Dili.

Nia hatutan, bainhira governu aumenta ona kapitál boot ba BNCTL, sei fó kréditu barak liután ba populasaun iha rai laran hodi apoiu dudu dezenvolvimentu ekonomia iha rai laran.

To’o ohin governu investe ona kapitál  millaun $25 ba BNCTL no  hosi investimentu ne’e BNCTL konsege fó fila ona osan millaun $15 ba kofre estadu.

“Rasio ne’ebé mak ami uza normálmente retornu ba kapitál governu ( millaun $25) entre  porsentu 7 to’o porsentu 12 kompara ho fundu mina-rai ne’ebé ita rai iha bons porsentu 4, maibé se ita rai iha BNCTL fó porsentu hosi 7-12,” Brígido esplika.

Tinan 2018, pedidu BNCTL ba governu husu millaun $50, maibé  tanba problema orsamentu governu aprova millaun $5. Tanba ne’e, BNCTL hein nafatin  atu tinan-tinan governu tau nafatin uitoan-uitoan para fortifika kapitál Banku nian.

To’o 2018,  BNCTL  iha ona asset millaun $140 resin hafoin hamriik nu’udar banku úniku estadu nian tuir dekretu lei nu.3/2011, 26 Janeiru. Total kliente ne’ebé asesu kréditu ativu  oras ne’e hamutuk rihun 17 ho orsamentu hamutuk millaun $80 ho jurus hosi porsentu 6 to’o porsentu 12.

Jornalista      : Agapito dos Santos

Editór            : Francisco Simões

HAKEREK NO HATÁN

Please enter your comment!
Please enter your name here