Diretór Operasaun AIFAESA, Gabriel da Costa. Imajen/Egas Cristovão

DILI, 4 juñu 2019 (TATOLI) – Autoridade Inspesaun no Fiskalizasaun Atividade Ekonómika no Sanitária (AIFAESA) sei esforsu maka’as hodi kontrola sigarru ilísitu (ilegál) sira ne’ebé kontinua fa’an iha merkadu Timor-Leste.

Diretór Operasaun AIFAESA, Gabriel da Costa, esplika, dekretu lei 14/2016 sobre rejime kontrolu tabaku, maka AIFAESA sei servisu ho entidade kompetente sira halo oinsá atu hapara produtu ilegál ne’e liuliu iha kapitál.

Gabriel da Costa, katak sigarru ilegál ne’ebé nafatin fa’an hanesan Surya 12, Marlboro mutin no mean sticker no seluk ne’ebé sei kontinua fa’an ilegál iha rai-laran ne’e hosi AIFAESA koordena ona ho parte seguransa liuliu Polísia Nasionál Timor-Leste (PNTL) para halo serbisu inspesaun ba sigarru ilísitu sira ne’e.

Nia klarifika katak, fatin sira ne’ebé sei halo inspesaun ne’e identifika hotu ona no iha tempu badak hodi organiza atu tun bá. Entretantu hosi parte distribuidór sira ne’ebé hatama sigarru legál ne’e hato’o mós keixa ba Ministériu Saúde (MS), Primeiru-Ministru, Parlamentu Nasionál iha Komisaun A no D no mós AIFAESA.

“Hosi parte distribuidór hanesan kompañia Surya Mas Trading, sira rasik mak halo karta ne’e ba no AIFAESA sei toma medida ba ida ne’e no sei halo koordenasaun ho seguransa para atua sigarru ilísitu iha kapitál,” Gabriel da Costa, afirma ohin, hodi responde ba despaxu urjente hosi gabinete Primeiru-Ministru nian iha Matadouru.

Servisu ne’e urjente, Gabriel da Costa tenik, AIFAESA tenke atua kedan no labele la’o mesak no sei hamutuk ho seguransa kuandu foti produtu sira ne’e tanba maioria ema sira ne’ebé fa’an ne’e mesak timoroan de’it (vendedór ki’ik sira).

“Ami foti halo prosesu kedan, ne’ebé oinsá para loron seluk sira labele simu sigarru sira ne’ebé tama mai para fa’an iha sira-nia loja”.

Gabriel dehan, fatin sira ne’ebé identifikadu fa’an sigarru ilegál ne’e mak iha área Tasi-Tolu, Comoro, mai to’o iha Bidau, Kulu-hun, Audian no fatin seluk tan. Tanba ne’e, AIFAESA tenke servisu maka’as, tanba loja sira ne’e haree hotu ona, iha evidénsia, hein bá hamutuk ho seguransa para halo inspesaun no foti produtu ne’e hodi halo destruisaun no halo prosesu ba ema ne’ebé fa’an hodi selu multa.

Sobre sigarru ilísitu ne’ebé tama iha merkadu, tuir dekretu lei 14/2016 hatete sigarru sira ne’ebé fa’an tenke tuir dalan legál, entaun ida ilegál ne’ebé tama mai ne’e husi dalan ilegál, fronteira, no portu seidauk hatene tanba ema sira ne’ebé hatama ne’e organiza malu metin.

“Ami rasik labele hatene, kuandu sirkula ona iha merkadu ne’e AIFAESA nia servisu atu halo inspesaun, maibé parte sira ne’e Alfándega mak sei tau-matan maka’as liu iha fronteira no portu ne’ebá”.

AIFAESA mós sei koopera ho Alfándega ho seguransa iha fronteira atubele asegura atu sigarru sira ne’e labele tama nafatin, tanba foin daudaun AIFAESA halo inspesaun iha munisípiu sira halo apreensaun (foti) sigarru ilísitu sira ne’e no halo destruisaun, maibé sigarru kontinua mai. Tanba ne’e AIFAESA buka tuir to’o agora seidauk hetan, mas sei buka maneira atubele hatene sé mak fornese produtu ilísitu ne’e.

Lee mós dekretu lei 14/2016: http://www.mj.gov.tl/jornal/public/docs/2016/serie_1/SERIE_I_NO_22.pdf

Jornalista     : Maria Auxiliadora

Editór           : Francisco Simões

HAKEREK NO HATÁN

Please enter your comment!
Please enter your name here