Ministru Transporte no Komunikasaun, José Agostinho da Silva. Imajen/Antonio Goncalves

DILI, 3 juñu 2019 (TATOLI)-Projesaun reseita ne’ebé Ministériu Transporte no Komunikasaun (MTK) atu rekolla ba kofre Estadu iha 2019 mak millaun $50.

“Ida ne’e obstákulu ida, iha 2019 ne’e ita bele ka lae? Ne’e obstákulu ba Ministériu Transporte no Komunikasaun, tanba iha 2018 ministériu hetan envelope fiskál millaun $2,6. Iha janeiru to’o setembru 2018, ministériu kompostu hosi diresaun nasionál sira, administrasaun direta no mós institutu públiku sira ninia totál reseita ne’ebé ita rekolla iha tempu ne’ebá, fulan sia millaun $11,1. Ha’u seidauk hetan informasaun kona-ba fulan tolu nian outubru, novembru no dezembru 2018,” Ministru Transporte no Komunikasaun, José Agostinho da Silva, afirma iha ámbitu tomada pose ba membru konsellu Autoridade Portuária Timor-Leste iha salaun Ministériu Transporte no Komunikasaun, Kaikoli, ohin.

Ministru relata hetan, osan aprovadu hosi Parlamentu Nasionál ho millaun $2,6, mas ministériu fó fali ba Estadu millaun $11,1 iha momentu ne’ebá  no bainhira fulan tolu nian tama soma hamutuk reseita pur volta millaun $14 ou millaun $15.

 “Entaun projesaun ita-nia ba 2019, ita esforsu para bele to’o millaun $50 tanba alokasaun orsamentu ba ministériu (MTK) iha 2019 ne’e sa’e ba millaun $7.6 ne’ebé aprova iha Parlamentu. Orsamentu sa’e parte ida ita kontente, mas parte sorin obstákulu ida, oinsá mak ita ezekuta osan ne’e tuir programa ne’ebé iha, entaun ezekusaun tenke kontrola, ita la ezekuta arbiru”.

Nia husu ba nia estrutura sira atu ezekuta osan ne’e ho responsabilidade no agresivu atu rekolla reseita ba kofre Estadu ho projesaun millaun $50 ne’e obstákulu ida.

“Espera bele to’o iha millaun 50, liu ne’e di’ak liu duké lato’o, mas ita esforsu ba. Reativa ita-nia kanál reseita sira ne’ebé mak iha”.

MTK nia natureza servisu mak oinsá rekolla reseita ba kofre Estadu no identifika kanál reseita sira ne’ebé iha. Ida ne’ebé funsiona tanba lei iha ona no ida ne’ebé seidauk, enkuadramentu jurídiku sira kria lei ba kanál sira ne’ebé ladauk funsiona.

Jornalista      : Maria Auxiliadora 

Editór            : Francisco Simões

HAKEREK NO HATÁN

Please enter your comment!
Please enter your name here