DILI, 03 maiu 2019 (TATOLI)Liuhusi primeiru julgamentu interrogatóriu Tribunál Distritál Dili iha segunda loraik ne’e, hamonu medida kausaun prizaun preventiva ba arguidu JB no fó Termu Identidade Rezidénsia (TIR) ba arguida M no arguidu J hodi hein prosesu investigasaun kontinuasaun.

Tribunál Dili hamonu sentensa komarka ba arguidu JB nu’udar Diretór Kompañia JVK International Movers ne’ebé hanesan na’in ba aimoruk droga ne’ebé entrega ba nia traballadór arguidu JSP ho nia kaben AS ho kilógrama 1.861 tama ba Kúpaun-Indonézia iha loron kuarta (29/05/2019) liu-ba.

Antes ne’e, polísia deteta aimoruk (droga) ne’e nia musaun hamutuk 4.874 no ikus mai tetu ho nia todan hamutuk kilógrama 1.861.

Arguidu JB ho nia kaben inisiál M no arguidu J, Polísia Nasionál Serbisu Investigasaun Kriminál (PNSIK) kaptura iha loron kinta (30 maiu 2019 liu-ba) iha sira nia rezidénsia, Fomento, Dili.

Tuir akuzasaun ne’ebé aprezenta hosi Ministériu Públiku, arguidu JB importa sasán sira ne’e mai hosi rai li’ur tama mai Timor-Leste liuhosi Aeruportu Internasionál Comoro, Dili, iha marsu nia laran hodi kontinua rai iha sira nia rezidénsia to’o loron tersa (28 maiu 2019) foin haruka suspeitu kazál rua, JSP no AS, lori ba Kúpaun ho dirasaun ne’ebé la klaru.

“Tribunál aplika prizaun preventiva ba arguidu JB no aplika TIR ba arguida M no arguidu J tuir artigu 183 Kódigu Prosesu Penál,” dehan Defensór Públiku, Estaque Guterres ba jornalista iha Tribunál Dili, ohin.

Aplika TIR ba arguida M no arguidu J tuir artigu 183 Kodigu Prosesu Penál (KPP) ne’ebé ko’alia kona-ba rekizitu jerál esetu termu ba identidade no rezidénsia, medida-koasaun bele aplika de’it kuandu: a) Arguidu halai, ka iha fundadu perigu ba arguidu atu halai, b) bele iha perturbasaun ba investigasaun ka ba julgamentu, nomeadamente tanba iha perigu ba prova nia akizisaun, konservasaun ka verasidade no. c) Fundadu perigu ba arguidu atu kontinua atividade kriminoza ka ba atu iha perturbasaun ba órden no trankuilidade públika, tuir krime nia sirkunstánsia ka delinkuente nia personalidade.

Prosesu julgamentu lidera hosi juiza Francisca Cabral no Ministériu Públiku reprezenta hosi prokuradór Jacinto Babo no Luis Hernâni Rangel. Entretantu, arguidu na’in tolu hetan asisténsia legál hosi defensór públiku, Estaque Guterres.

Hafoin julgamentu, polísia PNSIK lori kedas arguidu JB ba Komarka Becora ho karreta polísia nian. Durante julgamentu, reprezentante Embaixada Filipina iha Timor-Leste inklui família mós akompañia arguidu sira hodi fó korajen.

 

Jornalista: Eugénio Pereira

Editór: Xisto Freitas

Lee mós notísia iha kraik…

PNSIK Prende Ona Na’in Ba Droga

1 KOMENTÁRIU

HAKEREK NO HATÁN

Please enter your comment!
Please enter your name here