Ministru Transporte no Komunikasaun, José Agostinho da Silva. Imajen/Antonio Goncalves

DILI, 3 juñu 2019 (TATOLI)-Ministru Transporte no Komunikasaun, José Agostinho da Silva, informa, kanál reseita iha Ministériu Transporte no Komunikasaun liuliu iha Air Navigation Administration of Timor-Leste ka Administrasaun Navegasaun Aérea Timor-Leste (ANATL) iha 22 no foin funsiona de’it tolu no 19 seidauk funsiona tanba lei seidauk iha.

“Karik iha dekretu lei ruma nu’udar baze para ita rekolla reseita ne’e. Lei seidauk iha, ita halo kobransa ne’e kobransa ilegál, entaun ida ne’e obstákulu ba asesór legál sira, prepara lalais ezbosu lei ba kanál reseita 19 ne’e,” esklarese Ministru José Agostinho da Silva, iha ámbitu tomada pose ba membru konsellu Autoridade Portuária Timor-Leste (APORTIL), ohin, iha salaun MTK.

 Ho natureza servisu Ministériu Transporte no Komunikasaun nian, tenik Ministru José Agostinho, oinsá pro-ativu iha rekolla reseita doméstiku ne’e liuhosi ativa kanál reseita sira, para bele selu saláriu no vensimentu.

“Hanoin kanál reseita barak, kuandu ita ativa hotu, millaun $200 ne’e buat ki’ik ita bele ultrapasa mós kuandu funsiona didi’ak,” hateten José Agostinho.

Nia husu diresaun sira hotu, administrasaun direta no indireta iha MTK atu identifika sira-nia kanál reseita sira ne’e, dezafiu iha ne’ebé depois fó solusaun.

Ministru akresenta iha MTK ne’e iha governasaun dala hira, iha buat rua mak falta, dahuluk, apoia polítika laiha, segundu, orsamentu ne’ebé aloka limitadu tanba millaun $1 resin ba kada tinan diresaun nasionál hira no ajénsia autónoma sira, tanba millaun $1,1 ne’e sira labele halo buat ida.

“Mas iha tempu ida ne’e, buat rua ne’e kompletu. Apoia polítika hosi ministru no Primeiru-Ministru mós ho vontade tomak fó apoiu polítiku ba servisu MTK no orsamentu mós aloka millaun $7.6 iha 2019”.

Aléinde ANATL, iha Autoridade Portuária Timor-Leste (APORTIL), Autoridade Nasionál Komunikasaun (ANC), Aviasaun Sivíl Timor-Leste (ACTL) no diresaun nasionál administrasaun direta nian hanesan Diresaun Nasionál Transporte no Terrestre, Marítima, Postál, Infraestrutura no Komunikasaun.

“Ba autoridade administrasaun direta no indireta sira iha kanál reseita barak mak seidauk funsiona durante ne’e. Entaun, atu funsiona ne’e tenke iha lei para ativa ita-nia kanál reseita sira ne’e. ANATL iha tolu de’it ne’e iha lei nu’udar baze sira rekolla reseita, mas sira seluk iha 19 ne’e lei seidauk iha, entaun bainhira halo kobransa ema dehan ilegál, tanba ne’e maka ministériu iha nia polítika, primeira faze ita halo enkuadramentu jurídiku signifika asesór legál sira oinsá mak kria lei ba kanál reseita sira ne’ebé seidauk funsiona”.

Jornalista      : Maria Auxiliadora

Editór            : Francisco Simões

HAKEREK NO HATÁN

Please enter your comment!
Please enter your name here