Ministra Finansa ein ezersísiu, Sara Lobo Brites. Imajen/Egas Cristovão

DILI, 03 juñu 2019 (TATOLI) – Primeiru-Ministru (PM), Taur Matan Ruak halo enkontru semanál ho Ministra Finansa en ezersísiu, Sara Lobo Brites hodi ko’alia kona-ba asuntu rua, hanesan enkontru ho parseiru dezenvolvimentu sira no mós programa prioridade governu tinan 2020 to’o 2021.

Ministra Finansa en ezersísiu, Sara Lobo Brites hateten, enkontru ohin ho Xefe Governu hodi hetan orientasaun.

“Enkontru ohin ami ko’alia buat rua kona-ba enkontru ho doadór sira ne’ebé sei realiza iha loron 4 jullu no husu Primeiru-Ministru nia tempu no mós bele hasai konvite ba órgaun soberanu sira hanesan Prezidente Repúblika, Prezidente Parlamentu Nasionál, no mós Prezidente Tribunal Rekursu”, tenik Ministra ba jornalista sira iha Palásiu Governu, segunda ne’e.

Nune’e mós governante ne’e haktuir, nia parte simu orientasaun husi PM atu haree prioridade ba tinan 2020 no 2021, tanba iha programa governu iha projetu infraestrutura lubuk ida mak tenke implementa anuál, balun implementa multi anuál.

“Ita sei iha Jornada Orsamentál ne’ebé atu realiza iha 27 no 28 juñu, iha ne’ebá sei iha informasaun lubuk ida ne’ebé sei aprezenta husi ministériu ida-idak,” informa ministra.

Nia informa, kona-ba enkontru ho parseiru sira iha loron 4 jullu agora, sei diskute mós kona-ba ajenda ne’ebé governu sei hato’o ba parseiru sira, bazeia ba programa governu nian hodi bele orienta parseiru sira nia apoiu ba programa governu.

“Sasan barak mak ita presiza ko’alia ho sira, enkontru ne’e uluk tinan-tinan halo maibé iha tinan 2017 no 2018 la konsege realiza no agora ita atu realiza fali,” haktuir governante ne’e.

Tuir Ministra, enkontru ne’e sei ko’alia kona-ba programa hafoin doadór sira sei finansia programa ne’ebé governu atu implementa, tanba ne’e governu hakarak iha diálogu atu bele iha koordenasaun di’ak.

Enkontru loron 4 jullu ne’e sei involve parseiru hotu hanesan sira ne’ebé mak iha ona reprezentante iha Timor-Leste hanesan Uniaun Europeia (UE), Governu Austrália, Organizasaun Nasaun Unida (ONU), USAID, JICA (Ajénsia Kooperasaun Internasionál Japaun-sigla inglés), Embaixada Xina no seluk tan.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here