VARANDA DILI Estadu TL Presiza Fó Asisténsia Ba Kazál Timor Oan Ne’ebé Autoridade Indonézia...

Estadu TL Presiza Fó Asisténsia Ba Kazál Timor Oan Ne’ebé Autoridade Indonézia Prende

1127

DILI, 03 juñu 2019 (TATOLI)– Estadu Timor-Leste iha obrigasaun atu garante sidadaun hotu no husu ba governu atu fó asisténsia ba kazál Timoroan ne’ebé autoridade Indonézia prende iha fronteira Mota-Ain, foin lalais ne’e.

Servisu Alfándega Atambua, provínsia Kupaun, Timor Osidentál, Indonézia nian, prende kazál timoroan ne’e tanba lori ai-moruk    ne’ebé deskonfia droga hosi Timor-Leste ba Kapaun-Indonézia liuhosi fronteira Mota-Ain.

Eis Defensór Públiku no atuál Komisáriu Komisaun Anti Korrupsaun (CAC-sigla portugés), Sergio Hornay, hateten, preliminariamente Estadu presiza fó asisténsia ba nia sidadaun sira atu proteje, tanba Estadu nia obrigasaun ka objetivu jerál maka oinsá atu garante sidadaun sira nia direitu no liberdade tomak ba asesu justisa.

Ba Ajénsia TATOLI, ohin, iha Parlamentu Nasionál (PN), Sergio Hornay esplika, Timor-Leste nudár Estadu Direitu Demokrátiku, hakarak ka lakohi, tenke proteje nia sidadaun sira.

“Maibé ita tenke respeita ba krime ne’ebé maka sei iha ema nia jurisdisaun iha territóriu Indonézia nian. Signifika, ita tenke guarda maibé ita mós fó nafatin protesaun ba ita nia sidadaun sira oinsá akompaña no fó asisténsia sira atu sira bele hetan direitu ida ba prosesu ida ne’e,” esplika Sergio Hornay.

Atu lori sira mai julga iha ne’e, tuir Sergio Hornay, Timor-Leste seidauk iha akordu estradisaun.  “Ita iha ona lei pesoál kondenadu sira, krime organizadu iha rai li’ur maibé ita seidauk iha akordu estradisaun. Maibé, hanesan Estadu tenke buka esforsu tomak atu posivelmente bele fó garantia ba ita nia sidadaun sira no mós ba Estadu katak alfándega no imigrasaun hanesan instituisaun ida ne’ebé iha fileira oin fronteira nian.”

“Ha’u seidauk bele foti konkluzaun dehan iha infrasaun ka mal administrasaun ne’ebé mosu iha servisu alfándega no mós liuliu iha imigrasaun nian no Komisaun Anti Korrupsaun (CAC-Sigla Portugés) hamutuk ho ministériu públiku hanesan titular asaun penal sei buka ezersísiu makas oinsá maka atu domíniu no mós prevene situasaun sira ne’ebé maka lori integridade ho nia efeitu negativu ba Estadu,” esplika Sergio Hornay.

Nia hatutan, preliminariamente KAK iha ona koñesimentu hamutuk ho Polisia Servisu Investigasaun Kriminál (PSIK) tanba ne’e kompeténsia própriu PSIK nian, maibé la sees-an mós ba prosesu investigasaun ida ne’ebé maka sei apura hosi PSIK no mós iha posibilidade iha krime komersiál. Krime ba droga ne’ebé ida independentemente autónomu, maibé iha krime sira ne’ebé konexu.

Ministru Reforma Lejizlativa no Asuntu Parlamentár,
Fidelis Manuel Leite Magalhães. Imajen/Antonio Gonçalves

Governu liuhosi Ministru Reforma Lejizlativa no Asuntu Parlamentár, Fidelis Leite Magalhães, afirma, governu sei haree no iha hela dalan oinsá atu presta apoiu ba sidadaun timoroan na’in rua ne’e. Maibé kualkér iha devér hakarak proteje nia sidadaun atu bele hetan asisténsia ne’ebé loos, iha protesaun no apoiu legal.

Maibé kazu hirak ne’e akontese la’ós iha TL de’it maibé nasaun boot sira iha sistema di’ak liu, iha EUA, Rúsia, Uniaun Europeia, Reúne Unidu no nasaun hotu iha mundu kazu sira ne’e mosu.

“Ita preokupa kazu ida ne’e, maibé investigasaun sei la’o no ita hotu hein rezultadu. Maibé Estadu iha devér atu fó apoiu legal ba nia sidadaun iha ne’ebé de’it,” hateten Ministru fidelis Magalhães.

“Ita lalika komenta tanba iha faze ne’e tenke iha diskusaun kle’an no fó protesaun másimu ba ita nia sidadaun inklui diskusaun ba aplikasaun ba lei pena perpétua no pena morte,” nia tenik.

Jornalista      : Zezito Silva

Editór            : Francisco Simões

HAKEREK NO HATÁN

Please enter your comment!
Please enter your name here