Jogadór Lika-Lika FC (faru azúl) espresa ninia sentimentu orgullu iha kampu laran hafoin manán ekipa adversáriu. Imajen Mídia LFA

DILI, 31 maiu 2019 (TATOLI)—Lika-Lika tuir lian makasae dehan lais ka isin moris. Espíritu lika-lika lori klube estimadu hosi Munísipiu Viqueque, Lika-Lika FC ne’e sai lika-lika hodi hadau sira nia mehi. Mehi sai realidade. Kampu Demokrasia no adeptu sira sai sasin.

La hein no la imajina hetan, Lika-Lika FC bele liki Santa Cruz FC ho golu 3-0 liuhusi jogu jornada daruak Segunda Divizaun Liga Futeból Amadora (LFA) ne’ebé hala’o iha Kampu Demokrasia, Bairru Formosa, Dili, sesta (31/5/2019) tuku 16:00.

Lika-Lika FC utiliza formatu jogu 4-3-3. Santa Cruz mós utiliza 4-3-3. Formasaun jogu hanesan maibé rítmu jogu lahanesan. Lika-Lika FC lika-lika liu kompara ho Santa Cruz FC. Sira domina bola. Sira halimar bola dook no aas (bola long-termu inglés). Ho sira nia lais, bola iha gradeia adversáriu la falta. Rutina. Halo guarda rede Santa Cruz infrenta pankada bola to’o baruk.

Jogu atrativu. Atrai tebes adeptu ekipa rua. Biar hamriik iha rede nia li’ur no hamriik iha leet sira no hamriik iha loron manas nia laran maibé sira la sente baruk. Matan rihun ba rihun fihir ba kampu laran hodi suporta ida-idak nia ekipa. Sira asiste ho dilemátiku. Sé loos mak atu hatama uluk golu?

Adeptu sira-nia esperansa sé maka atu hatama uluk golu la atinje. Jogu parte dahuluk terminadu ho rezultadu zero-zero.

Hakat ba segunda parte, ekipa Lika-Lika kontinua halo ahi. Hodi sadik klube kapitál Dili ne’ebé naran boot mós iha jornada futeból Timor-Leste dezde tempu okupasaun Indonézia. Sadik to’o rezulta duni golu iha minutu 67. Golu ne’e marka hosi Manuel da Silva (11) liuhosi pasajen bola hosi nia belun médiu, Andre Sarmento (33). Golu refere imediatamente muda rezultadu ba 1-0.

Golu ida ne’e, la’ós motiva Santa Cruz sai pro-ativu maibé sira-nia vontade monu ba beibeik. Komunikasaun entre jogadór Santa Cruz la efetivu. Espíritu individuál hahú domina sira. Ignora espíritu ekipa. Tanba ne’e, pasajen bola sempre falla. Halo sira labele ezekuta golu. Kuandu jogadór Santa Cruz dezmotivadu, kria oportunidade ba kogadór Lika-Lika. Sira komesa utiliza fatin mamuk ne’ebé ekipa adversáriu la kontrola hodi lansa tan golu ida ba rede Santa Cruz. Falla iha defeza Egídio Gama (20). Nia ladún kontrola bola ho di’ak. Golu hatama hosi Andre Sarmento (33) iha minutu 75. Rezultadu nakfilak ba 2-0.

Haree ba rezultadu ne’ebé Lika-Lika konkista, Santa Cruz dezmotivadu ba beibeik. Defeza mós komesa hatudu burutu. Kwesi Bediako, nasionalidade Gana, obrigadu tenke simu kartaun mean iha minutu 81 tanba komete erru ne’ebé todan iha kampu laran hasoru jogadór Lika-Lika FC, Andre Sarmento (33).

Kartaun mean ne’ebé Kwesi hetan, implika Santa Cruz FC. Iha minutu 82, Santa Cruz tenke sofre tan golu ida hosi Lika-Lika FC. Golu marka hosi Manuel da Silva (11). Golu ida ne’e, lori Lika-Lika FC lidera jogu ho rezultadu 3-0.

Rezultadu ida ne’e, rezultadu priviléjiu ba sira (Lika-Lika FC). Basaa, ko’us sira sai hosi zona dezpromosaun (degradasi-termu Indonezia) ne’ebé durante ne’e sira preokupa. Ekipa refere okupa kedas iha zona seguru tanba hetan pontu 3 iha tabele klasifikasaun provizóriu.

Entretantu, DIT FC mantein iha primeiru ho pontu 6. FC Lero segundu ho pontu 3. Kuartu, Sporting ho pontu 1. Kintu, Nagardjo ho pontu 1. Maibé, Santa Cruz okupa liña mean ho pontu mamuk. Jogu ne’ebé hala’o lidera hosi árbitru Nívio Fernandes, juiz liña António Carvalho, Joviano dos Reis no árbitru rezerva mak António Fátima.

Hafoin jogu ramata, treinadór Lika-Lika FC konfesa katak nia orgullu tebes ho nia jogadór sira ne’ebé hatudu jogu bonitu to’o ikus konsege manán.

“Hau orgullu tebes ho ha’u nia jogadór sira nia komportamentu. Sira hatudu jogu di’ak to’o ikus ami manán. Ida ne’e ha’u kontente loos,” tenik Octavio da Costa.

Maski gaña pontu tolu, la kontente de’it ho ida ne’e maibé sira kontinua haka’as-án halo di’ak liu iha jogu tuir mai.

 “Ami kontente maibé la’ós kontente de’it ho ida ne’e tanba jogu sei naruk. Ami sei prepara-án di’ak liu-tan,” tenik Octavio.

Iha sorin seluk, ofisiál Santa Cruz FC, Mariano Soares Martins hateten, maski lakon maibé ida ne’e mak rezultadu hosi jogu.

“Ida ne’e mak rezultadu hosi jogu. Laiha jogu ne’ebé ekipa rua tenke sai manán-na’in hotu. Sempre ida lakon no ida manán. Ami-nia preparasaun mak hanesan ne’e ona,” dehan Mariano.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here