Ekipa Sporting Clube de Timor. Imajen Mídia LFA

DILI, 01 juñu 2019 (TATOLI)—Jogu entre ekipa Sporting Clube de Timor no FC Lero Segunda Divizaun Liga Futebol Amador (LFA) Grup B sei hala’o iha Estádiu Munisipál Dili, domingu (02/6/2019) tuku 16:00 otl.

Asistente treinadór Sporting, Luisinho dos Santos hateten sira-nia ekipa preparadu atu joga hasoru FC Lero. “Ami preparadu ona hasoru Lero. Sira ekipa ida ne’ebé forte iha segunda divizaun maibé ami optimista sei manán sira,” tenik Luisinho liuhosi konferénsia ba imprensa ne’ebé hala’o iha salaun Xanana Sport Center, Bairru Formosa, Dili, ohin.

Ekipa FC Lero. Imajen Mídia LFA

Nia hatutan, antes ne’e fallansu barak mak jogadór sira halo maibé durante semana hira nia laran konsege hadi’a hotu ona. “Jogu aban ne’e sei rame. Tanba ekipa rua ha’u hanoin sei hatudu hotu jogu ne’ebé di’ak. Hakarak hadau hotu pontu tolu. Hakarak ka lakohi ami tenke hetan pontu tolu,” tenik nia.

Iha fatin hanesan, treinadór FC, Lero João Baptista dehan ninia jogadór balun sei aleija maibé hanesan treinadór nia sei utiliza estratéjia di’ak nune’e bele manán Sporting.

“Ami nia jogadór balun sei araska maibé ha’u garante katak aban ami sei hatudu jogu ne’ebé di’ak hodi karrega. Ida ne’e hanesan jogu ba dala rua ami tenke haka’as-án duni para hetan pontu tolu,” João informa.

Entretantu, Formatu ba jogu aban Sporting seidauk fó sai ba publíku tanba sei konsidera segredu. Maibé, Lero sei utiliza formatu 4-3-3 nune’e bele halo jogu loke luan atu bele hamate jogu adversáriu nian.

Fó hanoin fali, iha jornada 1, Sporting la konsege hadau pontu tolu hosi Nagardjo FC tanba empata 1-1, nune’e ekipa refere hetan de’it pontu 1. Lero iha jornada 1 konsege hadau pontu tolu hosi Lika-Lika ho rezultadu golu 4-2.

Dadauk ne’e, tabela klasifikasaun provizóriu Grup B lidera hosi DIT ho pontu 6, Lero ho pontu 3, terseiru Lika-Lika ho pontu 3, Sporting ho pontu 1, Nagardjo ho pontu 1 no ikus liu Santa Cruz pontu zero.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here