Jogadór Cacusan FC no Aitana FC bainhira halo kontra atake iha Estádiu Munisipál Dili. Imajen Mídia LFA

DILI, 01 juñu 2019 (TATOLI)—Aitana FC hadeer hikas ona. Iha Segunda Divizaun Liga Futeból Amadór (LFA) époka 2018 liu-ba, Aitana FC derrota golu. Halo nia labele hakat ba Primeira Divizaun LFA. Ohin, sira hatudu sira nia ánimu jogu. Sira tidin Cacusan FC ho golu 5-1 iha jogu jornada daruak Segunda Divizaun LFA époka 2019 iha Estádiu Munisipál, Dili, sábadu (01/5/2019).

Hanesan baibain, kuandu jogu foin hahú, jogadór sira enérjiku. Kasa bola la sente kolen. Halai hadulas kampu sente baibain de’it. Iis Naruk. Hanesan jogadór ekipa Aitana no Cacusan, iha primeira parte, hahú kedas lansa kontra atake ho enérjiku. Cacusan halimar bola dook (bola long-termu inglés) maibé la konsege ultrapasa defeza Aitana.

Aitana halimar bola rai. Tipu hamate bola. Lakohi ansi hatama golu lalais maibé hein oportunidade. Bainhira adversáriu hakat sala, sira foti biban atu hatama golu. Golu besik dadaun iha odamatan oin. Iha minutu 22, Francelino Belo (22), fura duni rede Cacusan liu hosi bola pasa ne’ebé kalma hosi nia amigu Miguel Musa (80) iha grandeia Cacusan.

Golu ne’ebé Aitana lansa, lahamate espíritu jogadór Cacusan. Sira kontinua halo kontra atake hasoru adversáriu. Tanba ne’e, Caucan konsege responde duni golu ida iha minutu 28. Golu marka hosi Helder Soares (7) liuhosi xutu dook parte sikun direita nian. Hosi golu ne’e, muda rezultadu ba 1-1.

Haree ba rezultadu ne’ebé laiha diferente, ekipa rua tenke halo serbisu maka’as. Adeptu sira iha tribun parte loromonu no lorosa’e mós la nonók. Sira kontinua motiva ekipa rua iha kampu. Lori jogadór ekipa rua joga ho ksolok no hasa’e ambisaun atu hatama golu. Liu de’it minutu 2, defeza klaran Cacusan nian, Frazão Soares (5) sala kontrola bola ho di’ak iha ne’ebé loke kedas oportunidade ba avansadu Aitana, Nelson Freitas (75), marka tan golu furak ne’ebé guarda rede Cacusan nian hamriik hodi hateke de’it iha minutu 30. Rezultadu muda-án kedas ba 1-2.

Bele derrota ona golu rua maibé jogadór Cacusan fiar malu nafatin hodi luta kontra Aitana. Xutu barak mak avansadu Cacusan lansa maibé xutu hirak ne’e la kona alvu no balun salva hosi guarda rede Aitana, Fortunato Gomes (1). To’o minutu parte dahuluk terminadu, laiha tan golu ruma mak akontese.

Semo ba parte segunda, ekipa rua hatudu nafatin jogu ne’ebé bonitu. Jogu rigór halo adeptu sira la baruk fó suporta. Tatika Aitana la hela de’it ho tátika maibé fó duni rezultadu di’ak. Iha minutu 70, dala ida tan, Nelson Freitas (75) hetan oportunidade pasajen bola hosi parte defeza hodi lansa kedas golu. Rezultadu nakduir-án sai 3-1.

Minutu la’o dook dadaun ona. Esforsu Cacusan nian la másimu hanesan jogu primeiru. Espíritu hahú namlaik. Dezesperadu. Tanba ne’e, obriga treinadór Cacusan tenke fera ulun. Iha kampu nia ninin, treinadór nia liman book-án la para. Liman book-án hanesan polísia tránzitu dirije transporte rodoviáriu. Biar nune’e, la muda jogadór Cacusan nia rítmu jogu. Marka pasu.

Treinadór Aitana, Salvador da Silva mós la nonók. Maski festa golu maibé hakarak kontinua festa golu liu-tan. Nia orienta nia jogadór sira atu aproveita fatin mamuk hirak ne’ebé jogadór Cacusan labele kontrola ona. Orientasaun ne’e iha folin. Iha minutu 78, Gilson Mateus, prodúz tan golu ida hodi muda rezultadu Aitana la’o dook ona hosi Cacusan. Golu muda-án ba 4-1.

Ambisaun jogadór Aitana hetok aas. Hakarak atu hatama golu ba beibeik. Ambisaun ida ne’e, la’ós lori jogadór Aitana ba dalan lalehan maibé lori fali ba dalan infernu. He-he-he. Iha minutu 83, kapitaun Aitana FC, Miguel Ximenes (19) obrigadu tenke simu kartaun mean hosi árbitru tanba komete erru ne’ebé maka’as hasoru avansadu Cacusan, Edi Gusmão (31). Take him out! Lori nia sai imediata hosi kampu.

Maski jogadór hela de’it na’in 10 mak batalla iha kampu batalla maibé kontinua prodúz golu. Nelson Freitas (75), marka tan golu ida iha minutu extra 90+1, hodi lori Aitana ba vitória ho rezultadu 5-1. Entretantu, Cacusan hela ho derrota no hulan novidade triste ba nia knuuk, Becora.

Jogu dirije hosi árbitru Jaime Gonçalves, juiz liña Romário Malitete, Eufrâsio Silva no árbitru rezerva mak João Fatima.

Vitória ne’ebé Aitana hetan, lori Aitana hatúr iha leten aas hodi lidera Grup A ho pontu 6. Kablaki FC segundu lugár ho pontu 4. Fitun Estudante Lorosa’e okupa terseiru lugár ho pontu 4. Cacusan okupa kuartu lugár ho pontu 1. Porto Taibessi okupa kintu lugár ho pontu 1 no Zebra Baucau okupa sestu lugár ho pontu zero.

Biar lakon ho golu ne’ebé maka’as maibé treinadór Cacusan, Domingos Soares ho fuan boot no laran luak konfesa katak jogu sempre iha lakon no manán. Ba oin, nia promete, nia sei hadi’a di’ak liu-tan sira nia jogu nune’e labele derrota tan hanesan ne’e.

“Ohin ne’e ami halo fallansu barak loos. Maibé, prontu, jogu mak hanesan ne’e ona katak iha lakon no manán. Ha’u haree ona ami nia fallansu. Tan ne’e, ba oin ha’u sei hadi’a,” nia haklaken.

Iha sorin seluk, treinadór Aitana FC, Salvador da Silva hateten nia sente kontente tanba jogadór sira disiplina jogu no hatudu jogu bonitu nune’e konsege hadau duni pontu tolu hosi Cacusan.

“Ha’u kontente loos. Ha’u-nia jogadór sira disiplina ba treinu no kumpri orientasaun ne’ebé ha’u fó. Ne’e duni, iha duni rezultadu ne’ebé di’ak mai ami,” tenik Salvador.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here