UNICEF Nomea Marvi Sai Promotora Foinsa’e

0
177
Promotora Foinsa’e Timor-Leste, Maria Vitória. Imajen António Gonçalves

DILI, 07 maiu 2019 (TATOLI)— Fundu Nasaun Unida ba Labarik sira (UNICEF-sigla inglés) Timor-Leste, tersa ne’e, nomea vensedora The Voice Portugal (2018), Maria Vitória da Costa Borges (Marvi) sai Promotora Foinsa’e atu promove foinsa’e sira-nia lian no hasa’e konsiénsia ba asuntu sira ne’ebé maka afeta labarik sira.

Nomeasaun ne’e formaliza liuhusi asina akordu entre kantora Marvi ho Reprezentante UNICEF iha Timor-Leste, Valerie Taton, iha komemorasaun aniversáriu Konvensaun Direitu Labarik (KDL) ba tinan 30.

“Ha’u orgullu tebes no agradese ba UNICEF ne’ebé maka fó fiar no hili ona ha’u sai hanesan Promotora Foinsa’e UNICEF nian. Agora dadaun ha’u hamriik iha ne’e, sai hanesan advogada ida hodi bele tau matan fali ba labarik sira. Iha ne’e, ha’u reprezenta foinsaa’e sira besik metade hosi ha’u-nia nasaun nia populasaun no reprezenta sira-nia futuru,” dehan kantora Marvi ba partisipante sira hafoin asina akordu ho UNICEF iha Suai Room, Timor-Paza, Dili, tersa (7/5/2019).

Hafoin asina akordu, Reprezentante UNICEF iha Timor-Leste hateten nomeasaun Marvi sai hanesan Promotora Foinsa’e sei hamutuk ho embaxada oioin iha rai oioin no nia prezensa iha ne’e nu’udar mós promotora ba foinsa’e iha Timor-Leste.

 “Ha’u kontente tebes hodi simu Marvi nu’udar promotora ba foinsa’e. Marvi ohin espresa nia án ko’alia ho laran tomak. Ha’u fiar katak nia sei  halo nia kna’ar hodi promove konsientizasaun asuntu sira maka afeta labarik sira iha Timor-Leste no sei halo advokasia ba foinsa’e sira-nia direitu,” dehan Valerie Taton iha nia dekursu hodi simu Marvi tama iha família UNICEF–nian.

Nia hatutan, Marvi sei oferese nia tempu hanesan promotora Foinsa’e ba UNICEF hahú hosi fulan maiu 2019 to’o fulan maiu 2020.  Marvi sei halo serbisu ba asuntu sira maka afeta labarik no foeinsa’e sira-nia moris, inklui asesu ba edukasaun ho kualidade, fatin asegura ba aprendizajen, saúde infantil no dezafiu sira ho oportunidade ba foinsa’e iha plataforma oioin.

Entretantu, Komisária Direitu Ba Labarik, Dinorah Granadeiro, hateten nu’udar komisária ida ne’ebé iha papél atu promove direitu labarik sira nian, sei fó apoiu másimu ba Marvi nia serbisu nu’udar Promotora Foinsa’e ba UNICEF ne’ebé sei halo advokasia ba foinsa’e ninian.

“Marvi nia papél ne’e, barak liu oinsá maka atu promove no halo advokasia ba direitu juventude nian liga ho polítika Estadu Timor nian atu oinsá maka garantia juventude sira bele goza sira-nia direitu ba Estadu demokratiku ida ne’e,” Dinorah ba jornalista hafoin ramata asina akordu hodi formaliza Marvi sai Promotora Foinsa’e ba UNICEF Timor-Leste.

Serimónia asina akordu ida ne’e, nu’udar UNICEF Timor-Leste nia kontratu dahuluk ba Promotora Foinsa’e ida iha nasaun ne’e. Marvi hamutuk ho personalidade lista globál nian maka koñesidu no hetan respeitu tebes hosi kampu oioin inklui desportu, muzika performadór artista filme, entre sira barak ne’ebé maka iha dezempeñu papél importante ba apoiu UNICEF nia servisu globál.

Partisipa iha serimónia ne’e, Minsitru Justisa, Manuel Cárceres, Sekretáriu Estadu Komunikasaun Sosiál, Merício Juvinal Akara, membru Parlamentu Nasionál balun, korpu diplomátiku no konvidadu sira seluk.

Jornalista: Cancio Ximenes

Editór: Xisto Freitas

HUSIK IDA HATÁN