SLB Reseiu Ponta Leste, Ponta Leste Reseiu SLB

0
35
Asistente Treinadór AD SLB Laulara, Julião Monteiro (imajen karuk hatais faru metan). Imajen Mídia LFA

DILI, 23 maiu 2019 (TATOLI)—Jogu lororaik ne’e desizivu. Klube rua ne’ebé naran boot sei kompete malu. Klube AD SLB Laulara no AS Ponta Leste. Sé maka sei manán sé, seidauk iha predisaun serteja maibé minutu 90 mak sei fó resposta serteja.

Klube rua reseiu malu. AD SLB konsidera Ponta Leste joga di’ak tan ne’e sira tenke preparra estratéjia di’ak atu bele manán Ponta Leste. Entretantu, Ponta Leste konsidera la fásil manán SLB tanba jogadór SLB mesak iha esperiénsia joga.

Treinadór AS Ponta Leste, Eduardo Pereira

Asistente treinadór AD SLB, Julião Monteiro hateten, durante ne’e sira akompaña ona Ponta Leste nia jogu. Tanba ne’e, sira sei utiliza frakeza hirak ne’ebé adversáriu nian hodi lansa kontra atake liu-liu iha área meiu kampu.

 “Preparasaun ami nian másimu ona atu hasoru Ponta Leste, maibe ami sei uza sira nia fallansu ka frakeza sira nune’e bele kontra atake atu bele rezulta golu ruma no ami bele manán,” tenik Julião liuhosi konferénsia ba imprensa ne’ebé hala’o iha edifísiu Liga Futebol Madora, Bairru Formosa, kinta horsehik, relasiona ho jogu klube rua ne’ebé hala’o iha Estádiu Dili, sesta ne’e (24/5/2019), tuku 16:00 Otl.

]Tuir nia, jogador Ponta Leate maioria kualidade di’ak tan ne’e defísil ba sira atu manán maibé iha parte balun mak sira konsege deteta ona frakeza hosi Ponta Leste.

Iha fatin hanesan, treinadór Ponta Leste, Eduardo Pereira dehan, defisíl tebes nia ekipa hasoru SLB tanba maioria jogadór hosi ekipa refere joven no iha esperiénsia kle’an no koordensaun entre jogadór di’ak liu ekipa ne’ebe nia lidera.

“SLB hanesan ekipa ida ne’ebé forte no maioria jogadór mesak di’ak de’it no sira joga fiar malu loos, kompara ho ami nian jogadór iha esperiénsia barak maibé idade sira nian tuan hotu ona,” dehan Eduardo.

Treinador ne’e haktuir difikuldade ba sira hasoru ekipa istimadu hosi munisípiu Aileu ne’e mak hanesan jogadór Ponta Leste barak mak aleiza hafoin jornada daruak ramata. Hosi ida ne’e mak sai fallansu boot ba nia ekipa atu kompete.

“Foin lalais ami joga hasoru Académika ha’u nia jogadór barak mak aleiza. Entaun, ida ne’e mak sai difikuldade ba ami, maibe hanesan treinadór ha’u sei esforsu oinsá nune’e bele halo estratéjia jogu ida ne’ebé di’ak,” nia tenik.

AS Ponta Leste joga dala rua ona, manán dala rua, impata laiha, lakon laiha no oras ne’e daudauk Ponta Leste provizóriamente túr iha pozisaun daruak iha tabela klasifikasaun ho pontu 6. Enkuantu, SLB joga dala rua ona, impata ida, manán dala ida, lakon laiha, ho nune’e SLB túr iha pozisaun datoluk ho pontu 4 iha tabela klasifikasaun.

Jornalista: Mídia LFA

Editór: Xisto Freitas

HUSIK IDA HATÁN