DILI, 06 maiu 2019 (TATOLI)-Primeiru Ministru, Taur Matan Ruak, ohin, fó orientasaun ba Ministru Justisa, Manuel Cárceres da Costa, atu kria ekipa ida hodi halo negosiasaun ho Kompañia Portugal ENSUL kona-ba kontratu arrendamentu rai ne’ebé estabelese ona iha Governu anterior.
Tuir kontratu governu fó aluga rai iha ba kompañia ENSUL atu uza to’o tinan 50 no bele aumenta tan tinan 45. Iha kontratu ne’e, hakerek mós obrigasaun hosi kompañia Portuguesa ne’e hodi konstrui uma andár hamutuk in 15 ne’ebé implementa ona to’o iha loron 16 fulan Abril 2020. Maibé, Ezekutivu Timor-Leste nian la haree rezultadu hosi implementasaun ne’e tanba ne’e obriga governu atu revee kontratu ne’e tanba la fó benefísiu ba Estadu.
“Tuir akordu sira seidauk bele selu so tinan oin iha loron 16 Abril 2020 maka sira komesa selu, maibé to’o data ne’e ha’u hakarak haree uma andár 15 tuir akordu ne’e sira halo ka lae, ha’u ladún fiar ida”, dehan Ministru Manuel Cárceres da Costa, ba Jornalista sira hafoin halo enkontru ho Primeiru-Ministru iha Palásiu Governu.
Durante ne’e, governu la aplika taxa ba Kompañia ENSUL bainhira importa material konstrusaun hanesan simente no besi mai Timor Leste.
“Estadu kumpre ninia devér maka oferese buat hotu gratuita tanba importa simente no besi, maibé la selu impostu”, hateten Manuel Cárceres hodi afirma mós katak, ENSUL tenke kumpre ninia obrigasaun atu parte rua bele hetan benefísiu.
“Ha’u dehan ba Primeiru-Ministru, katak, diálogu nakloke tuir korridór lei, ha’u sei kria ekipa ida atu haree lei no akordu ne’e iha ne’ebé ENSUL kumpre no Timor mós kumpre”, nia tenik.
Jornalista: Agapito dos Santos
Editór: Francisco Simões
