Primeiru-Ministru Kongratula Scott Morrison

0
103
Primeiru-Ministru, Taur Matan Ruak, bainhira kongratula nia omologu liuhosi telefone. Imajen mídia GPM

DILI, 28 maiu 2019 (TATOLI) – Primeiru-Ministru, Taur Matan Ruak, kongratula Scott Morrison via telefone tanba manán eleisaun jerál Austrália iha loron 18 fulan-maiu 2019.

Tuir nota komunikadu ne’ebé TATOLI simu hosi gabinete Primeiru-Ministru ohin haktuir, felisitasaun ne’e hato’o iha loron 26 fulan-maiu, tuku 14.15 oras Timor nian.

Durante xamada telefonema, Xefe Governu, Taur Matan Ruak, konvida nia ómologu atu vizita Timor-Leste hodi partisipa iha komemorasaun tinan 20 Referendu no INTERFET sama ain iha Timor-Leste, ne’ebé sei selebra iha fulan-agostu no setembru tinan ne’e.

Liután Xefe Governu Timor-Leste dehan ba Scott Morrison katak, Governu ne’ebé nia lidera iha vontade no kompromisu hodi serbisu hamutuk ho Governu foun Austrália nian ne’ebé sei forma, ba intrese povu no Estadu rai rua nian.

Primeiru-Ministru, Scott Morrison, ne’ebé maihosi partidu Liberál ne’e agradese tebes ba xamada telefonema no reteira mós Governu foun Austrália nia vontade no kompromisu atu serbisu hamutuk di’ak liután ho Governu Timor-Leste iha oin mai.

Relasaun Timor-Leste ho Austrália hahú kedas iha funu mundiál daruak, relasaun ne’e kontinua iha tempu okupasaun Indonézia, ne’ebé Australianu barak mak sai ativista ba Timor-Leste nia auto determinasaun, no iha 1999 Austrália lidera INTERFET  tama Timor-Leste hodi rekopera fila-fali pás no estabilidade pós Referendu, no sai país ida ne’ebé ajuda Timor-Leste  nia konstrusaun iha área oioin to’o ohin loron.

Edisaun: Rita Almeida

HUSIK IDA HATÁN