iklan

NASIONÁL, DILI, POLÍTIKA

PM Orienta MNEK “Hakbesik” ASEAN Fó Hatene Intensaun TL

PM Orienta MNEK “Hakbesik” ASEAN Fó Hatene Intensaun TL

Ministru Negósius Estranjeirus no Kooperasaun Dionísio da Costa Babo Soares. Imajen António Goncalves

DILI, 24 maiu 2019 (TATOLI)-Primeiru-Ministru (PM), Taur Matan Ruak orienta Ministru Negósiu Estranjeiru no Kooperasaun (MNEK), Dionísio Babo Soares atu vizita tan nasaun membru ASEAN (Organizasaun Nasaun Sudezte Aziátiku) hodi fó hatene kona-ba intensaun Timor-Leste (TL) nian hodi hola parte iha organizasaun aziátika ne’e.

“Tanba tinan ualu ona maka ita hato’o ita-nia aplikasaun to’o ohin loron laiha rezultadu, maske ita halo buat barak ona, ita prepara aan kapás, ita mós atende enkontru hotu ASEAN nian, ita hetan ona atendimentu em termos de kooperasaun entre país rua, liuliu ita harii ona embaixada iha nasaun sira ne’e hotu, maibé to’o agora seidauk iha rezultadu finál,” informa Ministru Dionísio Babo ba jornalista sira hafoin enkontru ho primeiru-ministru hodi relata kona-ba vizita ne’ebé maka nia hala’o ba Jakarta Indonézia, iha Palásiu Governu, sexta (24/05).

Governante ne’e mós informa katak durante vizita ba Jakarta Indonézia, iha semana kotuk, nia parte hasoru malu ho sekretáriu jerál ASEAN nian no mós vizita kortezia ba nia omólogu, Indonézia, Retno Marsudi no ko’alia kona-ba kooperasaun bilaterál entre nasaun rua, liuliu kona-ba Indonézia nia polítika ne’ebé halo ona katak Timor-Leste tama la uza vistu. Maibé, Timor-Leste seidauk aplika polítika ne’ebé hanesan sira (Indonézia) ka polítika resiprosidade.

Tanba ne’e, tuir diplomata timoroan ne’e katak Primeiru-Ministru husu MNEK atu prepara dokumentu ne’e inklui mós vistu serbisu ne’ebé iha resiprosidade (izensaun vistu) ho nasaun seluk hanesan Inglatera. Nune’e mós, relasaun ho nasaun seluk hanesan Austrália, Nova Zelándia, Filipina, atu nune’e bele loke espasu atu bele iha interasaun di’ak entre nasaun no nia ema sira.

“Tanba ho interasaun bele estimula mós dezenvolvimentu ekonomia la’ós sira-nia rai de’it maibé ita-nia rai hotu, tanba konektividade importante,” konsidera Ministru Dionísio Babo Soares.

Governante ne’e mós haktuir, orientasaun ne’ebé nia simu husi Primeiru-Ministru kona-ba kestaun vistu ne’e, MNEK sei prepara dokumentu sira hodi haruka mai iha PM. Nune’e mós kona-ba ASEAN, Timor-Leste presiza informa nafatin nia pozisaun hanesan prioridade ida.

Razaun, tuir diplomata ne’e katak Timor-Leste hanesan país soberanu, ita mós tenke dehan ba ASEAN katak ita labele hein kle’ur liu, ita fó ita-nia intensaun hodi kumpre hotu ona rekerimentu. Se sira hakarak sira ita simu, se la simu ita, ita mós tenke redefine ita-nia polítika tanba Timor-Leste ne’e rai soberanu la’ós kolónia ida.

“Nune’e mós ita  membru CPLP nian, ita  kaer g7+ tanba ne’e ita mós husu sira atu komprende, ita halo esforsu hotu ona, se laiha rezultadu ka mudansa ba ita atu tama ba membru ASEAN ita tenke reorienta fali ita-nia polítika nu’udar país soberanu,” friza ministru Dionísio Babo Soares.

Iha biban hanesan, Ministru Negósiu Estranjeiru no Kooperasaun informa mós kona-ba lista nomeasaun diplomata ne’ebé mak MNEK atu nomea ba rai li’ur maibé sei hein rezultadu husi Prezidente Repúblika, Francisco Guterres, Lú Olo. “Husi Diplomata na’in 15 ne’ebé maka MNEK propoin ona ba Prezidente Repúblika atu fó konsiderasaun, seidauk hetan pose, nune’e na’in tolu de’it maka hetan ona agreement (konkordánsia) husi nasaun resipiente”.

Lee mós notísia: http://www.tatoli.tl/2019/05/mnek-sei-vizita-nasaun-membru-asean-hametin-kooperasaun/

http://www.tatoli.tl/2019/05/lista-nomeasaun-diplomata-hein-desizaun-pr/

Jornalista       : Nelia Rosario

Editór             : Rafy Belo

iklan
iklan

Leave a Reply

iklan
error: Content is protected !!