DILI, 10 maiu 2019 (TATOLI)-Ministru Justisa, Manuel Cárceres da Costa hatete, prosesu negosiasaun entre governu ho Jerente Otél Timor, Tiago Barrata, konklui ona. Tanba ne’e, kompañia ne’ebé zere propriedade estadu ne’e sei hahú selu arrendamentu ba kofre estadu hafoin tinan barak la selu.
Ministru Justisa la esplika detallu kona-ba valor orsamentu hira maka kompañia sei selu ba estadu no sei halo rekompensasaun durante tinan hira.
“Otél Timor, hanesan ha’u hateten, karta ne’e ha’u seidauk lee no iha meza leten, maibé sira prontu kumpre sira nia devér”, informa Ministru Justisa, Manuel Cárceres da Costa, ba Jornalista sira, ohin, iha nia servisu fatin, Caicoli, Dili.
Primeiru Governu Konstitusionál fó kontratu ba kompañia no hetan revizaun hosi IV Governu Konstitusionál fó aluga Otél Timor to’o loron 20 fulan Maiu 2027.
Jornalista : Agapito dos Santos
Editór : Francisco Simões