Órgaun Soberanu Haat Tenke Respeita Separasaun Podér

0
52
Imblema RDTL

LOIDAHAR, 20 maiu 2019 (TATOLI)—Órgaun Soberanu Haat tenke respeita no konsidera separasaun podér, katak órgaun ida-idak hala’o kna’ar lahó intervensaun ba malu.

 “Ai-riin haat ne’e tenke kaer metin unidade nasionál. Separasaun podér importante. Ai-riin haat ne’e ida-idak hala’o nia kna’ar. Prezidente garante unidade nasionál, Parlamentu Nasionál halo lei no fiskalizasaun, Governu ezekuta programa no Tribunál implementa lei. Tanba ne’e, labele intervensaun ba malu tuir konstituisaun haruka, nune’e ai-riin haat ne’e bele metin liu-tan,” Sekretáriu Administrasaun Munisípiu Liquiçá, Renato Nunes Serrão, ba Agência TATOLI hafoin selebra loron Restaurasaun Independénsia Timor-Leste ba dala 17 iha sede Suku Loidahar, Postu Administrativu Liquiçá Vila, segunda ne’e.

 Nia afirma, ho separasaun podér ne’ebé iha, la signifika órgaun sira fila kotuk ba malu maibé iha implementasaun kna’ar sempre interligadu, katak serbisu hamutuk oinsá atu lori nasaun ba dalan prosperidade.

Iha fatin hanesan, eis deputadu FRETILIN hosi lejizlatura dahuluk, Joaquim Barros Soares, husu líder nasionál sira atu túr hamutuk nune’e lori prosesu dezenvolvimenu iha rai laran ba atinje prosperidade.

“Ita bele iha diverjénsia polítika, maibé órgaun soberanu haat inklui líder istóriku sira tenke respeita malu no tenke iha komunikasaun ba malu. Labele fila kotuk ba malu”, tenik veteranu ne’e.

Nia salienta, selebrasaun Restaurasaun Independénsia ho tema: “Haforsa Unidade no Garante Estabilidade atu hala’o Dezenvolvimentu Nasionál”,  signifika líder boot sira tenke túr hamutuk hodi lori rai ne’e ba oin ho prósperu.

“Kuandu ligadu ho asuntu interese nasionál, ai-riin haat ne’e no líder nasionál sira tenke iha komunikasaun ba malu no la’o tuir lei,” Koordenadór Partidu FRETILIN Postu Liquiçá Vila ne’e fó hanoin.

Jornalista: Evaristo Soares Martins

Editór: Xisto Freitas

HUSIK IDA HATÁN