MNEK Fasilita Formasaun Multilateralizmu No Protokolu Ba Diplomata Sira

0
113
Formandu sira foto hamutuk hafoin simu sertifikadu formasaun nian. FOTO TATOLI: Nelia Rosário

DILI, 10 maiu 2019 (TATOLI)-Ministériu Negósiu Estranjeiru no Kooperasaun (MNEK) liuhusi Institutu Diplomátiku (ID) fasilita formasaun loron tolu, hahú kuarta no ramata sesta (10/05) ba funsionáriu sira ho formadór mai husi péritu ID Austrália nian iha área multilateralizmu no mós iha área protokolu nian ba diplomata karreira juniór sira.

Diretór Ezekutivu ID, Aurélio Guterres hateten katak formasaun loron tolu ne’e hanesan formasaun regulár ne’ebé ID Timor-Leste koopera ho ID Austrália. “Formasaun multilateralizmu ne’e foka liu ba diplomata sira ne’ebé mai ho nivél karreira sira, no ida seluk ba protokolu foka ba karreira junior sira,” informa Diretór Aurélio Guterres ba Ajénsia TATOLI, iha edifísiu MNEK, Praia dos Coqueiros-Díli, sesta ne’e.

Hodi hatutan: “Formasaun ne’ebé mak oferese husi ministériu ne’e hanesan formasaun regulár ba parte linguístika hanesan inglés no portugés”.

Diretór Ezekutivu ne’e mós informa katak kursu diplomátiku ne’e estruturadu iha nivel postu graduada ho kurtu prazu. Inklui, kursu lian portugés no inglés, nia peritu sira mós mai husi nasaun li’ur.

Nia reforsa katak se haruka ba formasaun iha rai li’ur entaun ida ka rua de’it tan ne’e konvida peritu sira mai fó formasaun iha Timor-Leste. Kooperasaun ba formasaun sira, ne’ebé mak la’o hela maka kooperasaun entre Timor-Leste ho Austrália, Kanadá, Tailándia, Filipina, Malázia no nasaun seluk tan.

Diplomata ne’ebé tuir formasaun ba área multilateralizmu ne’e na’in 25 nune’e mós protokolu nian. Hafoin formasaun, sira hetan sertifikadu husi ID Canberra, Austrália. “Formasaun ne’e importante atu bele aumenta sira-nia kapasidade iha área refere hodi nune’e bele hala’o serbisu ho di’ak liu,” konsidera diretór ID, MNEK.

Kona-ba nomeiasaun diplomata ba rai li’ur, Diretór Ezekutivu ID, Aurélio Guterres hateten katak tenke tuir formasaun, tuir lei rejime karreira rasik.

“Aleinde formasaun kurtu prazu, agora daudauk prepara hela programa formasaun kursu introdusaun, ne’ebé iha módulu haat modulu  primeiru konsentra ba embaixadór sira, módulu segundu ba konselór  ho sekretáriu sira, módulu terseiru ba administrasaun/protokolu sira no moduli da ikus ba adidu sira,” informa diretór.

“Diplomata nomeasaun polítika tenke tuir mós formasaun liu husi MNEK tanba reprezenta estadu. Tanba ne’e, ba oin tenke iha formasaun mós ba nomeasaun polítika sira hanesan adidu sira,” friza diretór Ezekutivu ID, Aurélio Guterres .

Jornalista       : Nelia Rosário

Editór             : Rafy Belo

HUSIK IDA HATÁN