MNEK “Avalia” Progresu Implementasaun Projetu Finansa Públika no PFMO

0
105
MNEK hamutuk ho parseiru sira no entidade relevante durante reuniaun iha salaun IEP. Foto TATOLI: Nelia Rosário

DILI, 06 Maiu 2019 (TATOLI)-Ministériu Negósiu Estranjeiru no Kooperasaun (MNEK) liuhusi servisu Ordenadór Nasionál (NAO) realiza Reuniaun Steering Committee-PFMO (Jestaun Finansa Públika no supervizaun-sigla inglés) hamutuk ho parseiru sira, ho objetivu atu haree fila fali progresu implementasaun projetu no relatóriu finál nune’e mós konsiderasaun ba prioridade no prinsípiu ba programa sira.

Tanba ne’e, liuhusi reuniaun ne’e atu fó hanoin ba ekipa jestaun programa sira kona-ba proposta no prinsípiu inovasaun ne’ebé maka bele habelar informasaun no koñesimentu atu suporta kualidade prátika no hasa’e estratéjia ou oportunidade ba finansa, atu bele hatene loloos rezultadu no impaktu kontribuisaun ne’ebé maka hola parte iha relatóriu no sistema jerál hotu.

Ministru Negósiu Estranjeiru no Kooperasaun, Dionísio Babo Soares informa katak iha reuniaun ne’e diskute kona-ba iha komponente rua hanesan Jestaun Finansa Públika no mós “public fund management and oversight” ka PFMO ne’e.

“Komponente rua ne’e maka ita haree, husi apoiu fundu ne’ebé maka Timor-Leste simu ona besik  sete e tal milhões, ne’ebé maka gasta tiha ona  no hetan kontrola husi Ministériu Finansa  liu mós husi tribunal das contas,” hateten Ministru, Dionísio Babo Soares, iha salaun Institutu Estudu Diplomátiku, MNEK, Praia dos Coqueiros-Díli, segunda (06/05).

“Ohin Prezidente Tribunál Rekursu, Inspetór Jerál Estadu, Presidente Komisaun C (asuntu finansa públika) husi Parlamentu Nasionál hamutuk mós ho Vise-Prezidente Instituto Camões, Portugal no Ministériu relevante sira hodi fó hanoin  no haree kona-ba progresu apoiu sira ne’e;  oinsá ho prosesu em termos de jestaun tanba osan sira ne’e bainhira to’o mai iha Timor-Leste tenke iha mós responsabilidade,” tenik tan governante ne’e.

Aprezentasaun relatóriu ne’e, komponente primeiru aprezenta husi Ministériu Finansa no komponente segundu aprezenta husi Instituto Camões, hodi iha intervensaun atu haree kona-ba aprovasaun relatóriu hodi nune’e bele halo mós aprezentasaun ba rezultadu sira.

Komponente rua ne’e, Jestaun finansa Públika nu’udar apoiu husi Fundu Europeu nian ba Governu Timor-Leste hamutuk mós ho apoiu seluk kona-ba boa governasaun, desentralizasaun, justisa no buat seluk ne’ebé serbisu hamutuk ho ministériu sira no jere husi Ministériu Finansa.

Enkuantu, komponente seluk hanesan PFMO hala’o liu husi institutu parseiru Camões, Portugál nian. Husi parseiru ne’e maka hala’o fali ho entidade timoroan serbisu iha laran.

Partisipa iha reuniaun ne’e, alende Ministru Negósiu Estranjeiru no Kooperasaun, Dionísio Babo Soares, Prezidente Tribunál  Rekursu Deolindo dos Santos, Vise-prezidente Instituto Camoes, Portugal, Gonçalo Teles Gomes, Silvia G. Lemos nu’udar Ofisíal Enkaregada NAO, Prezidente Komisaun C Parlamentu Nasionál no mós entidade husi Ministériu sira.

Jornalista        : Nelia Rosário

Editór              : Rafy Belo

HUSIK IDA HATÁN