MESSK Hala’o Enkontru Mensál Deskuti Progresu Ezekusaun OJE

0
29
Ministru Ensiñu Superiór, Siénsia no Kultura, Longuinhos dos Santos. Imajen: Egas Cristóvão

DILI, 23 maiu 2019 (TATOLI)—Dirijente hosi Ministériu Ensiñu Superiór, Siénsia no Kultura (MESSK), hamutuk ho Sekretaria Estadu Arte no Kultura (SEAK), hala’o enkontru mensál ida hodi atualiza progresu ezekusaun orsamentu jerál Estadu (OJE) 2019 nian.

 “Enkontru ne’e atu update progresu ezekusaun ba orsamentu 2019 nian no mós programa sira seluk ne’ebé maka planu tiha ona iha tinan 2019 para hatene ninia progresu kada fulan nune’e atu atinje ita-nia taxa ezekusaun orsamentu. MESSK no SEAK atinje ona padraun ezekusaun hosi primeira trimestrál no segunda trimestrál. To’o ohin dadér, atinje ona purvolta %32.13,” Longuinhos ba jornalista sira iha Palásiu Governu, kinta ne’e.

Iha fatin hanesan, Sekretáriu Estadu Arte no Kultura, Teófilo Caldas, informa ne’e enkontru mensál, katak kada fulan sempre hala’o enkontru jerál hodi hatene programa ne’ebé realizadu.

“Ami deskuti kona-ba programa ne’ebé realiza no alkansadu ona. Alkansa ne’e signifika realiza ona. Haree mós ba ezekusaun orsamentu tinan 2019 nian iha kada diresaun. Agora, programa balun realiza ona, maibé balun seidauk finaliza. Ezemplu, Sekretaria Estadu Arte no Kultura finaliza ona semináriu ida konvida Komisaun Antí Korrupsaun hodi esplika ba funsionáriu sira inklui kargu polítiku sira hodi halo prevensaun ba korrupsaun, koluzaun no nepotizmu. Ita mós labele hatene serbisu de’it, maibé tenke iha konsiénsia morál hodi koopera hodi kombate korrupsaun,” nia esplika.

MESSK inklui SEAK tutela ba Gabinete Ministru Edukasaun no Gabinete Ministru Edukasaun kompostu hosi Gabinete Ministru Ensiñu Superiór, Siénsia no Kultura no mós Institutu Nasionál Siénsia no Teknolojia.

Entretantu, Serbisu ba Edukasaun kompostu hosi Diresaun Jerál ba Ensiñu Superiór ba Siénsia no Teknolojia, Diresaun Nasionál ba Ensiñu Superiór Universitáriu, Diresaun Nasionál ba Ensiñu Superiór Tékniku, Gabinete ba Koordenasaun no Apoiu ba Estudante, Sekretariadu-Tékniku-Fundu Dezenvolvimentu Kapitál Umanu (FDCH-sigla portugés) no Institutu Politékniku Betano.

Nune’e mós, Sekretaria Estadu Arte no Kultura kompostu hosi Diresaun-Jerál Arte Kultura, Diresaun Nasionál Biblioteka, Diresaun Nasionál Patriomóniu Kulturál, Diresaun Nasionál Arte, Kultura no Indústria Kriativa Kulturál, Diresaun Nasionál ba Muzeu Rezisténsia, Akademia Arte, Kultura no Indústria Kriativa Kulturál.

Diresaun Jerál Ensiñu Superiór kompostu hosi Diresaun Administrasaun no Finansa, Diresaun Jerál Arte no Kultura no Sekretariadu Tékniku-Fundu Dezenvolvimentu Kapitál Umanu.

Hosi diresaun hirak ne’e, progresu ezekusaun to’o loron kinta (23/9) atinje ona pursentu 32.13, maibé tuir portál transparénsia MESSK inklui SEAK foin atinje pursentu 19.9.

Jornalista: Evaristo Soares Martins

Editór: Xisto Freitas

HUSIK IDA HATÁN