MESSK Diskute Prioridade Haat Ho PM Taur

0
129
MESSK, Longuinhos dos Santos, hasuru malu ho PM Taur Matan Ruak, ohin, iha Palásiu Governu, hodi entrega dezeñu universitáriu tolu nian. Foto GPM

DILI, 09 maiu 2019 (TATOLI) –Ministru Ensinu Superiór, Siénsia no Kultura (MESSK), Longuinhos dos Santos hasoru malu ho Primeiru-Ministru (PM), Taur Matan Ruak hodi diskute no konsulta prioridade haat.

“Ohin mai hasoru malu ho Primeiru-Ministru, atu bele halo diskusaun no konsultasaun kona-ba prioridade haat hanesan prosesu no progresu kona-ba estudu viabilidade kona-ba kriasaun Sidade Universitáriu Aileu, kona-ba levantamentu dadus rekursu umanu iha Fundu Dezenvolvimentu Kapitál Humanu (FDCH), alterasaun Dekretu Lei nú.2/2011 kona-ba Konsellu-Administrasaun FDCH, no ikus liu pontu situasaun kona-ba proposta husi Universidade Nasionál Timor-Leste (UNTL) atu halo reabilitasaun ba eis edifísiu Ospitál Lahane,” informa Ministru Ensinu Superiór, Siénsia no Kultura, Longuinhos dos Santos ba jornalista sira iha Palásiu Governu, kinta ne’e (09/05).

Tuir Ministru, proposta husi UNTL atu uza eis edifísiu Ospitál Lahane ba aula estudante sira, liu-liu ba Fakuldade Medisina no Siénsia Saúde nian.

“Jestaun UNTL agora la’o hela maibé presiza tan sala aprendizajen liu-liu ba fakuldade medisina nian, tanba ne’e mak proposta ne’e mai iha Ministériu Ensinu Superiór, atu bele fasilita reabilitasaun ba edifísiu ne’e,” dehan ministru Longuinhos.

Maske nune’e, governante ne’e akresenta tan, proposta ne’e seidauk bele atinji tanba eis-edifísiu Ospitál Lahane iha ona planu ba Ministériu Saúde nian.

Nune’e mós kona-ba konstrusaun ba Sidade Universitáriu Aileu, Ministru informa sei iha estudu viabilidade no bainhira realiza hotu mak bele tama iha faze konstrusaun.

“Sidade Universitáriu Aileu sai programa esensiál ba Programa VIII Governu nian, ne’ebé durante tinan lima tenke atinji metas katak tenke dezenvolve,” kompromete ministru.

Maske nune’e, nia admite orsamentu ba programa ne’e seidauk hatene tamba sei iha faze estudu viabilidade no estudu ne’e tama ona iha faze dezeñu, hafoin bele hatene osan hira mak ita bele mensiona ba konstrusaun Sidade Universitáriu Aileu.

Jornalista: Julia Chatarina

Editór      : Rafy Belo

HUSIK IDA HATÁN