MAP Sei Foku ba Produsaun Ai-han no Ortikultura

0
70
Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, 22 maiu 2019 (TATOLI)-Programa ne’ebé Ministériu Agrikultura no Peska (MAP) trasa ba tinan oin, sei foku nafatin ba produsaun ai-han ba ema nia nesesidade báziku mak hanesan hare, batar no ortikultura.

“Ita mós hanoin ona atu bele hakat liután ba área ne’ebé durante ne’e ita hanesan haluha uitoan, área peska, ita hakarak atu investe maka’as iha peska, depois ita mós hakarak investe iha pekuária”,  informa Ministru Agrikultura no Peska, Joaquim José Gusmão dos Reis, ohin, hafoin reuniaun Konsellu Ministru iha Palásiu Governu, Dili.

Hatán sobre produsaun pekuária iha Timor-Leste ne’ebé sei menus no liga ba akordu komérsiu fronteirisu ne’ebé Timor-Leste asina hamutuk ho Indonézia no Banku Dezenvolvimentu Aziátiku iha Fiji, foin lalais ne’e, atu bele halo komérsiu iha pekuária nian mós, Ministru Joaquim dehan, ne’e komesa fó vantajen ba Timor-Leste atu bele halo negósiu iha fronteira liuliu ba área pekuária nian.

“Durante ne’e ita bele hatama ona manu moris husi Indonézia, ita halo risk assessment, maibé ita seidauk bele hatama ita-nia karau moris ba ne’ebá, só na’an de’it no ida ne’e mós limitadu tebes. Ho MoU ida ne’e ita halo ona ezersísiu balun, hanesan Indonézia nian atu mai ita-nia sira preokupa kona-ba moras ibun no kukun (mulut dan kuku), bruceloza, maibé ita Timór laiha ne’e (moras mulut dan kuku), maibé ita seidauk sertifika loloos”.

Nia hatutan, tenke iha estudu entre parte rua ne’e haree hotu, sertifika dehan livre bele halo tranzasaun. Ho ida ne’e, sai hanesan baze ida atu bele hasa’e produsaun iha setór pekuária nian.

Ministru Joaquim José Gusmão dos Reis, salienta, polítika Governu nian mak oinsá bele hasa’e produsaun maka’as, bainhira haree ba programa Governu nian liuliu ba foos atu hasa’e produsaun to’o porsentu 70 no husik porsentu 30 ba iha importasaun.

Maibé ida ne’e ligadu ba fatór seluk mós tanba ne’e Governu esforsu nafatin ho orsamentu ne’ebé iha tanba bá oin Ministériu Agrikultura hakarak konsentra ba fatin sira ne’ebé iha irrigasaun boot no fatin luan atu bele haree nia rezultadu.

Sobre preparasaun orsamentu ba 2020, Joaquim hatete, kona-ba orsamentu tinan ne’e bazeia ba pakote ne’ebé distribui ho montante millaun US$14 resin no hosi ne’e mak foin fahe ho orsamentu ne’ebé iha tiha ona no ba MAP lato’o, maibé ida ne’e mak pakote ne’ebé Governu fó.

“Maibé agora daudaun iha mudansa ida katak ita halo orsamentu bazeia ba programa, tanba ne’e mak programa ne’ebé trasa hela ne’e ita sei tau orsamentu ba para ita hakarak rezultadu ne’ebé atinje ne’e ita hatene tiha ona”, informa Ministru Joaquim José  Gusmão dos Reis.

Jornalista   : Maria Auxiliadora   

Editór         : Francisco Simões

 

HUSIK IDA HATÁN