iklan

NASIONÁL, DILI

Majór Jenerál Lere Aseita Polítika Transferénsia Pesoál F-FDTL ba PNTL

Majór Jenerál Lere Aseita Polítika Transferénsia Pesoál F-FDTL ba PNTL

Xefe Estado Maiór Jenerál F-FDTL, Majór Jenerál Lere Anan Timur. Imajen/Antonio Goncalves

DILI, 08 maiu 2019 (TATOLI)-Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál, Lere Anan Timur,  aseita ho polítika Governasaun da-Ualu nian atu halo transferénsia pesoál F-FDTL ba instituisaun Polísia Nasional Timor Leste(PNTL) bainhira termina kontratu iha F-FDTL.

Lei servisu militár ne’ebé implementa daudaun ne’e la’ós obrigatóriu to’o mate,  maibé kontratadu ba soldadu sira  durante tinan hitu tenke remata servisu nu’udar pesoál forsa defeza.

“Ministru Defeza nia opiniaun no ha’u nia opiniaun, di’ak liu ne’e ita nia soldadu sira hakotu sira nia kontratu ba vida sivíl ne’e ita haruka ba polísia”, hateten Majór Jenerál, Lere Anan Timur, hodi responde Jornalista sira, ohin, iha Palásiu Prezidente Nicolau Lobato.

Polítika Governu nian ne’e, meius ida atu hamenus gastu orsamentu ba rekrutamentu no formasaun hodi kontinua uza rekursu estadu ne’ebé treinadu ona iha instituisaun F-FDTL.

Bainhira konsege implementa polítika ne’e, Lere Anan Timur prefere atu koloka eis forsa armada sira ne’e ba iha unidade espesiál sira, unidade tránzitu, polisiamentu komunitária. Enkuantu ba kuadru ofisiál no sarjentu sira tenke konkorre ba kuadru permanente hodi servisu iha instituisaun ne’e to’o tinan 60 hodi reforma.

Jornalista   : Agapito dos Santos

Editór         : Francisco Simões

 

 

iklan
iklan

Leave a Reply

iklan
error: Content is protected !!