Loke Sidade Universitáriu iha Aileu, Governu Sei Halo Estudu Kle’an

0
104
Ministru Ensiñu Superiór, Siénsia no Kultura, Longuinhos dos Santos Imajen: Foto: Egas Cristóvão

DILI, 15 maiu 2019 (TATOLI)—Ministru Ensiñu Superiór, Siénsia no Kultura (MESSK), Longuinhos dos Santos, hateten governu sei halo estudu kle’an hafoin loke sidade universidade iha Munisípiu Aileu.

 “Sidade universitáriu Aileu iha hela faze estudu abilidade. Iha estudu viabilidade sei determina katak merese atu loke kursu saida loos,”  Longuinhos ko’alia ba jornalista sira iha Palásiu Governu, kuarta (15/5/2019).

Governante ne’e haklaken, programa Oitavu Governu atu harii sidade universitáriu iha Munisípiu Aileu ne’e desentraliza liuhusi Universidade Nasionál Timor-Lorosa’e (UNTL).

Tuir programa Oitavu Governu Konstituisionál liuhusi Ministériu Ensiñu Superiór Siénsia no Kultura (MESSK) katak sei dezenvolve Munisípiu Aileu sai sidade universitáriu.

Prosesu atu kria polu foun, tenke hatama uluk proposta atu bele kria polu iha munisípiu no tenke tuir kritériu  MESSK no Agência Nacional para a Avaliação e Acreditação Academica (ANAAA) iha. Nune’e mós tenke iha rai, infraestrutura edifísiu, laboratóriu, biblioteka no mós rekursu umanu.

Longuingos informa, dezenvolve sidade universitáriu Aileu ho objetivu atu bele halo desentralizasaun ba timoroan sira ne’ebé mak hakarak asesu iha ensiñu superiór públiku nian.

Jornalista: Evaristo Soares Martins

Editór: Xisto Freitas

HUSIK IDA HATÁN