Lere Aseita F-FDTL Fó Formasaun Sívika Ba Kandidatu Traballadór

0
184
Xefe Estadu Maior Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur. Imajen Mídia PR

DILI, 09 maiu (TATOLI)—Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur,  aseita pedidu Sekretaria Estadu Polítika Formasaun Profisionál no Empregu (SEPFOPE) atu fó formasaun sívika no treinamentu fíziku ba kadidatu traballadór timoroan sira ne’ebé atu ba serbisu iha Austrália, Korea Súl no Japaun.

Lere  dehan, F-FDTL iha membru ofisiál no sarjentu sira ne’ebé iha esperiénsia kle’an bele fahe sira nia esperiénsia ba joven sira ne’e atu muda sira nia mentalidade prepara ba serbisu iha rai li’ur ho dixiplina atu labele hamosu problema iha ema nia rai.

“SEPFOPE preokupa ho ita-nia juventude ne’ebé atu ba serbisu iha rai li’ur, liuliu sira-nia komportamentu ka dixiplina no sira-nia kondisaun fíziku. Ne’e maka sira mai husu Komandu F-FDTL apoiu SEPFOPE iha área treinamentu fiziku  ninian,” dehan Lare ba jornalista sira iha edifisiu Kuartel Jerál F-FDTL, Fatuhada, Dili, kinta (09/05).

 “Militar ne’e dixiplina kedas. Buat ne’e parte ida di’ak ba ita nia Estadu. Ita haruka ema ba serbisu, sira (traballadór) importa fali osan mai Timor. Ne’e buat di’ak,” dehan Lere ho hamnasa.

Iha fatin hanesan,  Sekretáriu Estadu Polítika Formasaun Profisionál no Empregu, Julião da Silva dehan tempu besik nia parte sei hakerek karta kooperasaun ida ba F-FDTL atu kria kooperasaun.

SEPFOPE mós asina ona memorandu intendimentu ho Governu Korea no Austrália atu haruka joven sira ba serbisu tinan tolu to’o tinan lima no agora SEPFOPE mós kontinua halo negosiasaun ho nasaun Japaun hodi haruka mós joven sira atu ba serbisu, maibé problema ne’ebé Timor-Leste infrenta maka atitudi no fíziku ladún di’ak.

Tuir planu, bainhira akordu ne’e implementa sei fó treinamentu uluk ba joven hamutuk 3.000 ne’ebé agora dadaun tuir hela formasaun lian Korea iha Becora no Sentru Tibar.

“Agora governu Korea ho Austrália kontente absorve ita nia forsa traballu liu ema na’in 2.000, maibé ema nia emprezáriu sira iha Korea ho Austrália dúvids ita-nia fíziku no mentál entaun ita tenke utiliza situasaun ne’ebé iha esperiénsia di’ak no vontade di’ak,” Júlio haklaken.

Governante ne’e hateten, Majór Jenerál Lere Anan Timur husu SEPFOPE atu iha tempu badak haruka karta ba F-FDTL nune’e bele orienta estrutura Komponente Naval F-FDTL ho Terrestre atu bele fó treinamentu.

Jornalista: Eugénio Pereira

Editór: Xisto Freitas

HUSIK IDA HATÁN