Kontribuisaun Ema Hotu Sai Xave ba Asegura Estabilidade

0
26
Prezidente Autoridade Munusípiu Bobonaro, Jeferino Soares dos Santos. Imajen/Agapito dos Santos

CAILACO, 20 maiu 2019 (TATOLI)-Atu asegura seguransa iha Munisípiu Bobonaro, liuliu iha liña fronteira  presiza ema hotu nia kontribuisaun. Tanba ne’e, Prezidente Autoridade Munisípiu Bobonaro, Jeferino Soares dos Santos, mensiona tan, kontribuisaun entidade tantu militár no sivíl sai save importante hodi mantein pas no estabilidade.

Jeferino Soares dos Santos, haktuir, kontribuisaun autoridade hahú kedas hosi sidadaun baibain, autoridade lokál, veteranu, polisia, FALINTIL- FDTL, ho joven sira.

“Ami respeita poténsia hotu iha munisípiu nee, hahú kedas autoridade sivíl, militár, veteranu atu fó liman ba malu hodi servisu hamutuk ba mantein situasaun seguransa iha hakmatek ba ita nia sidadaun,” hateten Prezidente Autoridade Munusípiu Bobonaro, Jeferino Soares dos Santos, ba Ajénsia TATOLI, horiseik,  iha Cailaco, Bobonaro.

Durante asume kargu nu’udar prezidente autoridade tinan haat nia laran, Jeferino Soares dos Santos, nota númeru krime menus tanba hetan kooperasaun no kontribuisaun hosi ema hotu. Alende nee, serimoniál kulturál tara bandu ne’ebé implementa hosi komunidade sira iha suku-suku mós kontribui ba estabilidade.

Atu kontinua mantein koordenasaun no kooperasaun entre autoridade munisipál ho seguransa maka oras nee estabelese konsellu seguransa munisipál ho kargu prezidente konsellu asume hosi prezidente autoridade munisipál no vise asume hosi Komandante Polisia munisípiu.

Enkuantu, F-FDTL la involve iha estrutura tamba destakentu forsa iha munisípiu ho provizóriu de’it. Maibé, liña koordenasaun no komunikasaun lao di’ak.

“Ho PNTL, ami iha koordenasaun di’ak hahú kedas hosi estrutura PNTL munisípiu, Batalhão Ordem Publico (BOP), Unidade Polisia Fronteira (UPF) hodi garante nafatin estabilidade,” esplika Jeferino Soares dos Santos.

Jornalista               : Agapito dos Santos

Editór                      : Francisco Simões

HUSIK IDA HATÁN