KM Sei Análize Proposta MS Kona-ba Servisu Ambulánsia Atu Sai IP

0
80
Primeiru-Ministru, Taur Matan Ruak, prezide enkontru Konsellu Ministru iha Palásiu Governu, Kuarta, (22/05/2019). Imajen Egas Cristovão

DILI, 22 maiu 2019 (TATOLI) – Ministru Saúde em ezersísiu, Bonifácio Maukoli dos Reis, ohin aprezenta proposta ida ba Konsellu-Ministru (KM), kona-ba servisu ambulánsia nasionál no emerjénsia médika atu sai Institutu Públiku (IP), maske nune’e ezekutivu sira seidauk aprova proposta ne’e tanba sei halo análize hafoin foti desizaun.

Ministru Estadu Prezidénsia Konsellu-Ministru, Hermenegildo Augusto Cabral Pereira informa katak Ministru Saúde em ezersísiu halo aprezentasaun ida kona-ba servisu nasionál ambulánsia no emerjénsia atu halo institutu públiku ida.

“Hetan duni diskusaun kle’an maibé Konsellu-Ministru deside husik proposta ida ne’e hodi hetan análize kle’an tan hodi iha futuru Konsellu-Ministru bele tau fali iha ajenda hodi diskute no aprova,” hateten Ministru, Hermenegildo Augusto Cabral Pereira ba jornalista sira iha Palásiu Governu, kuarta ne’e.

Ministru Saúde em ezersísiu, Bonifácio Maukoli dos Reis esplika proposta ne’e hodi harii sistema nasionál ambulánsia no emerjénsia médika, no haree mós ba orsamentu ba instituisaun ne’e tanba nu’udar órgaun indireta estadu, nia iha kompeténsia própria administrativamente finanseiru no mós ba patrimóniu. “Primeiru-Ministru haruka hadi’a no foin lori fila mai”.

Vise-Ministru ba Dezenvolvimentu Estratéjiku Saúde Bonifácio Maukoli dos Reis,Imajen/Egas Cristovão

Objetivu husi harii instituisaun ne’e, atu aumenta nível funsionamentu no hatán ba servisu médiku ho kualidade atu garante kuidadu ba emerjénsia médika iha territóriu nasionál tomak, inklui transporte husi sinistradu ka vítima moras.

Alende ne’e, Konsellu-Ministru mós fó plenus puderes (podér tomak) ba Ministru Saúde em ezersísiu, Bonifácio Maukoli dos Reis hodi asina nota entendimentu ho Repúblika Populár Xina.

“Liga ho plenus puderes ne’ebé mak fó ba Ministériu Saúde atu asina kontratu ho Governu Xina kona-ba brigada médiku xinez, ne’ebé mak tinan-tinan rua sempre selebra kontratu,” tenik atuál Vise-Ministru ba Dezenvolvimentu Estratéjiku Saúde ne’e.

Tuir governante ne’e, kontratu hotu ona entaun brigada médiku tuan sira ba no foun mai fali, liu-liu espesialista kardiolojia, neurolojia, ortopedia ne’ebé durante fulan ida ne’e sira mai ona.

“Akordu tempu badak selebra ona tanba Konsellu-Ministru fó ona plenus puderes ba Ministériu Saúde,” informa ministru.

Jornalista       : Julia Chatarina

Editór             : Rafy Belo

HUSIK IDA HATÁN