DILI, 18 maiu 2019 (TATOLI)—Governu liuhosi Sekretáriu Estadu Arte no Kultura (SEA), Teófilo Caldas, ho prezensa Primeiru-Ministru, Taur Matan Ruak, no mós lia-na’in sira hosi munisípiu 12, inklui Rejiaun Administrativu Espesiál Oe-Cusse, Ambeno (RAEOA), Sábadu (18/5/2019), harii hikas ai to’os ne’ebé uluk ema deskoñesidu halo estragus iha Jardim Borja da Costa, Motael, Dili.
Ai to’os ne’e governu ho lia na’in sira harii tiha ona iha tinan 2006, maibé hetan etragus tiha hosi ema deskoñesidu. Ho nune’e governu harii hikas fali ho esperansa katak, fó matak malirin atu Timor-Leste bele buras ba bei-beik, liuliu unidade nasionál, estabilidade nasionál no dezenvolvimentu nasionál.
Serimónia ritual ne’e mós parte ida hosi serimónia komemorasaun loron restaurasaun independénsia ba dala XVII, 20 maiu 2002-2019.
Sekretáriu Estadu Teófilo Caldas, haktuir, serimónia tradisionál ne’e kontinuasaun hosi serimónia 2006 nian, momentu ne’ebá governu realiza ona serimónia rua, ida maka serimónia haloot kro’at no ida seluk maka lia na’in sira no autoridade sira husu ba Maromak, matebian no natureza atu loke dalan hodi prosesa dada kadoras mai Timor-Leste no fronteira marítima ne’ebé mak Timor-Leste atinje ona.
Iha biban ne’e, Primeiru-Ministru, Taur Matan Ruak, husu ba komunidade sira ne’ebé hela besik ai to’os, liuliu joven sira atu respeita buat hotu ne’ebé mai hosi Timor-Leste nia lisaun no tradisaun.
“Ida ne’e la’ós ita nia tempu maka foin halo, ida ne’e jerasaun ba jerasaun maka to’o ohin loron, ida ne’e hola parte iha ita nia istória, ita mai hosi ne’ebé, ita iha ne’ebé no atu ba ne’ebé”, afirma Primeiru-Ministru Taur Matan Ruak.
Taur Matan Ruak, hateten, ohin tempu modernu, ema hotu hanoin ai to’os ida ne’e hanesan ai baibain, maibé uluk avó sira nia tempu, se maka la respeita ai lulik, la hahí, nia aban no bainrua hola feto nia oan sira sei tilun diuk, ibun sakat, ain kle’uk no seluk tan. Ho nune’e, Primeiru-Ministru, espera katak, ema deskoñesidu ne’ebé estraga ai lulik, sira nia jerasaun sei la terus tanba sira lahatene saida maka sira halo, maibé ida ne’e la’ós ai-manas ne’ebé manas kedan iha ibun maibé to’o tempu ida asidente ruma akontese maka foin hanoin fali katak karik uluk la estraga sasán lulik maka sai nune’e ona karik.
Atu evita situasaun moris ne’ebé deskontente, Primeiru-Ministru, husu ba ema hotu atu respeita lulik nu’udar kultura no lisan Timor-Leste nian.
Jornalista : Zezito Silva
Editór : Francisco Simões
