IDN-TL Kontinua Fó Formasaun Ba Xefe Suku

0
164
Diretór Institutu Defeza Nasionál, Donaciano Costa Gomes “Pedro Klamar Fuik”

DILI, 22 maiu 2019 (TATOLI)Institutu Defeza Nasionál Timor-Leste (IDN-TL), kontinua realiza formasaun seguransa defeza nasionál ba xefe suku hamutuk 25 mai hosi Munisípiu Manufahi, Oé-Cusse ,Viqueque, Bobonaro no Covalima.

Antes ne’e, formasaun semana dahuluk hahú iha fulan maiu ne’e, ne’ebé partisipa ona hosi xefe suku hamutuk 24. Semana daruak ho xefe suku 24. Semana ba datoluk ho xefe suku 19. Nune’e, xefe suku hamutuk 67 maka hetan ona formasaun hosi IDN.

Tuir ajenda IDN nian,  hosi xefe suku 452 ne’e,  ba tinan ne’e sei fó uluk formasaun ba xefe suku 250, maibé ba xefe suku 202 sei kontinua formasaun iha tinan oin.

Koordenadór Formasaun Institutu Defeza Nasionál Timor-Leste (IDN-TL),  Nuno Cavelo Sarmento hateten, métodu ba formasaun seguransa no defeza ba semana datoluk hanesan formasaun  semana dahuluk no semana daruak hodi fó hanoin ba xefe suku  452 atu hakle’an sira nia koñesimentu kle’an kona-ba pensamentu siguransa defeza nasionál.

“Ita-nia autoridade lokál sira presiza iha intendementu di’ak ba pensamentu seguransa defeza nasionál, nune’e hodi partilla ba nia povu kontribui ba estabilidade,” dehan Nuno ba jornalista iha salaun enkontru, Pateo, Kolmera, Dili, ohin.

Iha fatin hanesan, Diretór Institutu Defeza Nasionál, Donaciano Costa Gomes “Pedro Klamar Fuik”  dehan, IDN iha  nia planu estratéjiku tenke tuir nasaun no Estadu nia hanoin ho hakarak hodi valoriza polísia, forsa armada, fusionáriu públiku, sosiedade sivíl iha área lideransa nasionál.

“Ita-boot xefe suku sira hola parte iha estrutura Estadu, tan ne’e promove no defende kultura, promove kompriensaun, armonia, solidariedade entre povu hotu hodi kontribui ba estabilidade nasionál,” nia esplika.

Enkuantu, Xefe Suku Liaruca, Postu Administrativu Ossu, Munisípiu Viqueque, Folimeno Soares tenik, formasaun seguransa no defeza importante tebes tanba aumenta sira-nia kapasidade bainhira fila ba suku bele habelar esperiénsia ba komunidade hodi kompriende atu kontribui ba estabilidade.

Maski formasaun datoluk hala’o ba loron rua ona, maibé xefe suku hosi Rejiaun Administrativa Espesiál Oe-Cusse Ambeno (REAO) la marka prezensa lahó justifikasaun serteja.

Jornalista: Eugénio Pereira

 Editór: Xisto Freitas

HUSIK IDA HATÁN