“Ha’u Hakarak Husik Hela Planu Estratéjiku Rejionál”

0
776
Prezidente Autoridade RAEOA, Mari Alkatiri. Imajen/Dok.eis GPM

Oe-Cusse, 24 maiu 2019 (TATOLI)– “Ha’u nia mandatu sei remata iha tempu besik. Se hakarak kontinua Planu Estratéjiku Rejionál ne’e, bele, maibé se maka hakarak hatama iha gaveta, hatama ba.”

Prezidente Autoridade Rejiaun Administrativu Espesiál Oe-Cusse Ambeno (RAEOA), Mari Alkatiri, hato’o lia menon ne’e, ohin, iha Oe-Cusse, hodi responde Ajénsia TATOLI hafoin halo lansamentu Planu Estratéjiku Rejionál 2019-2023.

Mari Alkatiri haktuir, iha Governasaun dahuluk (2002-2006) nu’udar Primeiru-Ministru, nia husik hela planu barak, hanesan planu urbanu Dili nian ho Baucau, maibé governu tuir mai hatama iha gaveta, ida ne’e maka Dili sai runguranga hanesan ne’e.

“Ha’u atu termina ha’u nia mandatu, ha’u hakarak husik Planu Estratéjiku Rejionál, se maka mai hakarak kontinua bele kontinua, se maka hakarak hatama iha gaveta, bele hatama ba tanba iha ona lisaun barak iha pasadu,” afirma Mari Alkatiri.

Mari Alkatiri akresenta katak, uluk iha planu dezenvolvimentu nasionál, iha mós programa investimentu setoriál, hirak ne’e hotu governu tuir mai la konsidera, nune’e maka tuir Alkatiri, Timor la la’o ba oin, maibé fila fali ba kotuk.

Alkatiri konta tuir katak, planu estratéjiku dezenvolvimentu nasionál mós uluk halo estudu, maibé iha implementasaun maka la respeita, enkuantu planu estratéjiku rejionál mós halo modelu liuhosi konsultasaun públiku hafoin halo lansamentu. Ho nune’e, Alkatiri esplika, ohin ba oin, halo fali sosializasaun  planu ne’e ba komunidade sira, hakat ba suku no aldeia atu sira bele hatene planu ida ne’e.

“Sosializasaun tenke hahú ona atu to’o tempu bele iha ona implementasaun ba planu ida ne’e ho di’ak,” afirma Mari Alkatiri, hodi esklarese mós katak, Planu Estratéjiku Rejionál ne’e mai ho intensaun atu deskonsentra dezenvolvimentu ba fatin hothotu iha RAEOA.

Jornalista   : Zezito Silva

Editór         : Francisco Simões

HUSIK IDA HATÁN