DILI, 15 maiu 2019 (TATOLI)—VIII Governu Konstitusionál, tuir planu, sei harii Akademia Arte Indústria Kriativa Kulturál iha Timor-Leste iha tinan 2020. Akademia ne’ebé atu loke, faze dahuluk foku ba área tolu maka hanesan área múzika, dansa no arteplístika (halai liu ba pinta).
“Agora dadaun estatutu ne’e finaliza ona. Fulan oin espesialista ida hosi Charles Darwin University (CDU) Austrália sei mai haree kurríkulu ne’ebé halo tiha ona. Tinan 2020, hahú ona ho tinan dahuluk akademia nian,” dehan Diretora Jerál Kultura hosi Sekretaria Estadu Arte no Kultura, Cecília Maria Belo de Assis, ba jornalista TATOLI liuhusi entrevista ne’ebé halao iha nia kna’ar fatin, Avenida Portugal, Dili, kuarta (15/5/2019).
Oras ne’e dadaun, nia hatutan, governu identifika ona dosente sira inklui bolseiru na’in 15 ne’ebé eskola iha Cuba ne’ebé agora iha ona Timor. Governu mós indentifika ona joven sira ne’ebé maka hasai ona kursu iha área múzika atu bele hanorin matéria espesífika sira ne’e iha tinan dahuluk akademia nian.
Tuir planu, Cecília informa, sei simu estudante ba área tolu refere hamutuk ema 200 ne’ebé sei tuir prosesu inskrisaun liuhusi fó sai avizu.
Kona-ba nesesidade ensiñu aprendizajen, nia hatutan, governu halo ona rekrutamentu ba timoroan espeslista na’in rua iha área múzika atu halo kurríkulu.
“Iha tinan 2015, ami tau ona orsamentu atu harii akademia no sosa piano, materiál pinta nian, sosa material ne’ebé ensiñu nian. Fatin maka seidauk iha maibé ami mós tau orsamentu atu aluga fatin ba akademia. Iha ona jurista timoroan ida ne’ebé haree dokumentu legál para harii akademia ne’e,” Cecília tenik.
Nia haktuir, iha IV Governu Konstitusionál, tinan 2011, governu halo ona lansamentu ba akademia refere liuhusi halo konferénsia internasionál ida ne’ebé halibur espesialista sira hosi Austrália, Amerika no Indonéza. Akademia ne’e harii bazeia ba rezolusaun Governu Nú. 12/2011.
Jornalista: Cancio Ximenes
Editór: Xisto Freitas
